ეუთოს მინსკის ჯგუფი: 15 მაისს ყარაბაღის კონფლიქტის ზონაში პირველი დარტყმა აზერბაიჯანმა განახორციელა

ეუთოს მინსკის ჯგუფმა დღეს, 19 მაისს გამოაქვეყნა განცხადება, რომელშიც ასკვნის, რომ 15 მაისს ყარაბაღის კონფლიქტის ზონაში პირველი დარტყმა აზერბაიჯანმა განახორციელა.

„რამდენიმე სარწმუნო წყაროდან შეგროვილი ინფორმაციის თანახმად, 15 მაისს აზრბაიჯანის შეიარაღებულმა ძალებმა გაუშვეს რაკეტა, რომელმაც ყარაბაღის კონფლიქტის გამყოფი ზოლი გადაკვეთა, და სამხედრო ტექნიკაზე დარტყმა განახორციელა.

საღამოს 16-დან 17 მაისამდე სომხეთის შეიარაღებულმა ძალებმა სხვადასხვა კალიბრის ნაღმმტყორცნებიდან საპასუხო ცეცხლი გახსნეს.

ორივე მხარის მოქმედება ცეცხლის შეწყვეტის რეჟიმის მნიშვნელოვან დარღვევას წარმოადგენს და საგანგაშოა“, – ნათქვამია ეუთოს მინსკის ჯგუფის თანათავმჯდომარეების განცხადებაში.

როგორც წინა შემთხვევებისას, შუამავლებმა ახლაც დაგმეს ყარაბაღის კონფლიქტის ზონაში, გამყოფ ზოლზე  ცეცხლის შეწყვეტის რეჟიმის დარღვევის ფაქტი და მხარეებს მოუწოდეს, რომ კონფლიქტის მომავალი ესკალაციის თავიდან ასაცილებლად ყველა საჭირო ზომას მიმართონ.

რეაქცია სომხეთში

სომხეთში უაღრესად მნიშვნელოვნად მიაჩნიათ ის, რომ მინსკის ჯგუფმა პირველად გააკეთა კონკრეტული განცხადება და მიუთითა, თუ ვინ განახორციელა პირველი დარტყმა.

“სომხეთი ყოველთვის მოუწოდებდა ეუთოს მინსკის ჯგუფის თანათავმჯდომარეებს, კონკრეტულად დაესახელებინათ  ცეცხლის შეწყვეტის რეჟიმის დაღვევაში დამნაშავე და პასუხისმგებელი მხარე“, – თქვა საგარეო საქმეთა მინისტრის მოვალეობის შემსრულებელმა ედვარდ ნალბანდიანმა 19 მაისს კვიპროსზე ევროპის საბჭოს გენერალურ მდივანთან ტუბიერენ იაგლანდთან შეხვედრისას.

“აზერბაიჯანი უარყოფს გამოძიების მექანიზმების შექმნას, და სურს, თავიდან აიცილოს  მის მიერ დაზავების რეჟიმის პერიოდულად დარღვევის პასუხისმგებლობა. თუმცა 18 მაისს ეუთოს მინსკის ჯგუფის თანათავმჯდომარეების მიერ გავრცელებული არასტანდარტული განცხადება მკაფიოდ მიუთითებს დამნაშავე მხარეზე“, – თქვა ნალბანდიანმა.

„ინფორმირებულ მოქალაქეთა კავშირის“ ექსპერტის ვაგე გუსაკიანის  ონლაინ გამოცემა „ლრაგირში“ გამოქვეყნებული კომენტარი:

“კონფლიქტის ზონის გამყოფი ზოლიდან მოსული ინფორმაციის ობიექტურობა დარეგულირების პროცესის ღერძს წარმოადგენს… აზერბაიჯანულ მხარეს, როგორც ჩანს, არ სურს, რომ ეუთოს მინსკის ჯგუფს ინციდენტების გამოძიების მექანიზმების შექმნის საშუალება მისცეს. არადა, სწორედ ეს არის საზღვარზე მრავალრიცხოვანი ინციდენტის შემცირების ერთადერთი გზა“.

აზერბაიჯანის რეაქცია

“აზერბაიჯანის რესპუბლიკის შეაიარაღებული ძალები აზერბაიჯანის სუვერენულ ტერიტორიებზე მოქმედებენ და საკუთარი ქვეყნის თავდაცვას უზრუნველყოფენ“, – ასეთი კომენტარი გააკეთა აზერბაიჯანის საგარეო საქმეთა სამინისტროს პრეს-სამსახურის ხელმძღვანელმა ჰიკმეტ გაჯიევმა ეუთოს მინსკის ჯგუფის თანათავმჯდომარეების განცხადებაზე.

„გაოცებასა და წუხილს იწვევს ის ფაქტი, რომ ეუთოს მინსკის ჯგუფის თანათავმჯდომარეები, სირცხვილის გრძნობის გარეშე აღნიშნავენ, რომ 16 და 17 მაისს სომხეთის შეიარაღებულმა ძალებმა „საპასუხო ცეცხლი“ გახსნეს. ჩნდება კითხვა – რა ესაქმებათ სომეხ სამხედრო მოსამსახურეებს აზერბაიჯანულ მიწაზე?

აქამდე ამ საერთაშორისო სტრუქტურასა და მინსკის ჯგუფის  თანათავმჯდომარეებს სომხეთის ან მისი მფარველების მიერ აზერბაიჯანის ტერიტორიის ოკუპაციის ფაქტის შესახებ არ განუცხადებიათ. შეიძლება ვივარაუდოთ, თანათავმჯდომარეები ამგვარი განცხადებით იმიტომ გამოვიდნენ, რომ სომხეთის პრეზიდენტისთვის სერჟ სარქსიანისთვის ესიამოვნებინათ ან მისთვის თავი მოეწონებინათ.

ეუთოს მინსკის ჯგუფის თანათავმჯდომარეების მიერ ლაჩინის ოკუპაციის მორიგ წლისთავზე გაკეთებული განცხადება, ასევე შეიძლება  მათი მხრიდან კონფლიქტის სამართლიანად მოგვარებისადმი  გულგრილ დამოკიდებულებად მივიჩნიოთ“, – განაცხადა აზერბაიჯანის საგარეო საქმეთა სამინისტროს პრეს-სამსახურის ხელმძღვანელმა.

ტერმინოლოგია, რომელიც გამოყენებულია სტატიაში, ყოველთვის არ გამოხატავს რედაქციის პოზიციას