ერევნის „ფირდუსის“ ბაზრობის აღების მცდელობა ჩაიშალა

დღეს, ადრე დილით ერევნის მერიის თანამშრომლები პოლიციის დახმარებით   ხალხში „ფირდუსის“ სახელით ცნობილი ბაზრობიდან მოვჭრეების გაყრას და პავილიონების დემონტაჟის დაწყებას ცდილობდნენ. მაგრამ ბაზრობის თანამშრომლებმა მათ წინააღმდეგობა გაუწიეს. სხვათა შორის, ამ ბაზრობაზე შესაძლებელია იაფფასიანი საქონლის შეძენა – ძირითადად, ტანსაცმლის. თავად მოვაჭრეები, ისევე როგორც მათი კლიენტები, სომხეთში არცთუ ყველაზე მდიდარ ადამიანები არიან.

დღეს ტერიტორიაზე ტრაქტორი მიიყვანეს, მაგრამ მოვაჭრეებმა და  მიმდებარე შენობების მაცხოვრებლებმა გზა გადაკეტეს და მას ბაზრობის ტერიტორიაზე შესვლის საშუალება არ მისცეს. მოვაჭრეებს თავიანთი პავილიონების გახსნა აუკრძალეს და ბაზრობის დაცლისკენ მოუწოდეს. მაგრამ ადგილზე შეკრებილებმა ისეთი ხმაური ატეხეს, რომ მერიის თანამშრომლები იძულებულები გახდნენ, ბაზრობის ტერიტორია ტექნიკასთან ერთად  დაეტოვებინათ.

„იმის ნაცვლად, რომ წავიდნენ და ქალაქის ცენტრი მოაწესრიგონ, ბაზრობის ასაღებად მოვიდნენ. ჩვენ აქ ფულს ვშოულობთ. ცოტათ მაინც იფიქრონ ჩვენზე. ეს ჩვენთვის ერთდერთი შესაძლებლობაა, ცოტაოდენი ფული გამოვიმუშაოთ. აქ მომუშავე ადამიანები ოჯახებს არჩენენ, და რასაც შოულობენ, მთლიანად ოჯახის გამოკვებას ხმარდება“, – თქვა ბაზრობის ერთ-ერთმა გამყიდველმა.

ჯერ კიდევ 5 ივნისს ერევნის მერმა ტარონ მარგარიანმა სამუშაო თათბირის დროს  თანამშრომლებს ბაზრობის მოვაჭრეებთან მოლაპარაკება და მშენებლობის დაწყებამდე მათთვის ქალაქში სხვა ადგილის შეთავაზება დაავალა.  თუმცა, მოვაჭრეები ირწმუნებიან, რომ მათთან ერთად მსგავსი საკითხი არ განხილულა.

მეტიც, ისინი საერთოდ არ იყვნენ გათვითცნობიერებულები იმის თაობაზე, რომ დილით ბაზრობის ასაღებად ტრაქტორი უნდა მოეყვანათ. მოვაჭრეები ამბობენ, რომ ბაზრობის გადატანის წინაამდეგი არ არინ, თუმცა სურთ, რომ ეს ძველის დანგრევამდე მოხდეს, წინააღმდეგ შემთხვევაში, ისინი გაურკვეველი ვადით აღმოჩნდებიან უმუშევრები.

„დღეს წასასვლელი არსად გვაქვს, რა უნდა ვქნათ? ჩვენი საქონელი აქ დავტოვოთ და წავიდეთ? უეცრად მოვიდნენ, ჩვენ ბაზრობაზე შემოვიდნენ და ამბობენ, – უნდა ავიღოთო. არადა, შვილები გვყავს, ოჯახები, ასე ხომ არ შეიძლება“, – ჩივის მეორე მოვაჭრე.

მშრომელთა უფლებები რომ არ დაირღვეს, საკითხი განსაკუთრებული წესით განიხილეს სომხეთის ადამიანის უფლებათა დამცველის ოფისში, რის შედეგაც ომბუდსმენმა ერევნის მერიას განცხადებით მიმართა.

„ფირდუსის“ ბაზრობის უკმაყოფილო თანამშრომლებმა მშენებლობის დეკემბრამდე გადადება და ვაჭრობის გაგრძელების უფლება მოითხოვეს. ჯერეჯერობით მოვაჭრეების თხოვნას მერიიდან არანაირად არ გამოხმაურებიან.