დიდი ბრიტანეთის თავდაცვის მინისტრმა თანამდებობა სექსუალური სკანდალის გამო დატოვა

1 ნოემბერს დიდი ბრიტანეთის  თავდაცვის მინისტრი გადადგა. მის მიერ გამოქვეყნებულ განცხადებაში ნათქვამია: „პარლამენტის მისამართით გამოთქმული ბევრი ბრალდება, რაც ბოლო დღეებში გაჩნდა – სიმართლე არ არის, მაგრამ მე ვაღიარებ, რომ იმ მაღალი სტანდარტების შესაბამისად არ ვიქცეოდი, რასაც დიდი ბრიტანეთის შეიარაღებულ ძალებთან კავშირში მყოფი ყველა ადამიანი უნდა იცავდეს“.

ფელონმა ასევე აღნიშნა: “ქცევის ნორმები იცვლება. ის, რაც 10-15 წლის წინ მისაღები იყო, ამჟამად კატეგორიულად მიუღებელია, ამიტომაც ჩემი გადადგომის გადაწყვეტილება სწორი იყო“.

გაუგებარია, თუ კონკრეტულად რომელი ინციდენტის გამო გადადგა მინისტრი. რამდენიმე დღის წინ ცნობილი გახდა, რომ 2002 წელს ჟურნალისტებთან ერთად ვახშმისას ფელონმა ჟურნალისტ ჯულია ჰარტლი-ბრიუიერს მუხლზე ხელი დაადო.

ჰარტლი-ბრიუიერმა BBC-ს რადიოს ეთერში თქვა:  „თუ ფელონის გადადგომის მიზეზი ის გახდა, რომ ის 15 წლის წინ ჩემს მუხლს შეეხო, მაშინ ეს ისტორიაში ყველაზე აბსურდული გადადგომაა. იმედია, მისი გადაწყვეტილება ამ ინციდენტს არ უკავშირდება“ –  მან ხაზგასმით აღნიშნა, რომ თავს შევიწროვების მსხვერპლად არ მიიჩნევს.

დიდი ბრიტანეთის პრემიერ-მინისტრმა ტერეზა მეიმ განაცხადა, რომ აფასებს პატიოსანი საქციელის იმ მაგალითს, რაც მაიკლ ფელონმა თანამდებობიდან გადადგომით აჩვენა.

ბოლო თვის განმავლობაში ეს უკვე ამ სახის მეოთხე გახმაურებული ისტორიაა. მანამდე სექსუალური შევიწროების გამო ბრალი დასდეს ცნობილ კინოპოდიუსერ ჰარვი ვაინშტაინს და მსახიობებს – კევინ სპეისის და დასტინ ჰოფმანს. შედეგად, ვაინშტაინმა საკუთარ კომპანიაში ადგილი დაკარგა, ხოლო სპეისიმ – პრესტიჟული პრემია „ემი“.