აზერბაიჯანის საფეხბურთო ნაკრებს ახალი მთავარი მწვრთნელი ჰყავს

აზერბაიჯანის ფეხბურთის ფედერაციამ კლუბ „ყარაბაღის“ მთავარ მწვრთნელთან გურბან გურბანოვთან ექვსწლიანი კონტრაქტი გააფორმა. 45 წლის სპეციალისტი დეკემბრის დასაწყისიდან ეროვნულ ნაკრებს გაწვრთნის, და ამავდროულად „ყარაბაღში“ისევ გააგრძელებს თავის საქმიანობას.

გურბანოვი აზერბაიჯანის ნაკრების მთავარი მწვრთნელის თანამდებობაზე ხორვატ სპეციალისტს, რობერტ პროსინეჩკის შეცვლის. პროსინეჩკის ხელმძღვანელობით აზერბაიჯანის ნაკრებმა მსოფლიო ჩემპიონატის შესარჩევ ტურნირზე თავისთვის რეკორდული 10 ქულა დააგროვა. მიუხედავად ამისა, აზერბაიჯანის ფეხბურთის ფედერაციამ გადაწყვიტა, რომ ხორვატ მწვრთნელთან კონტრაქტი არ გაეგრძელებინა.

აზერბაიჯანის ფეხბურთის ფედერაციის პრეზიდენტმა როვნაგ აბდულაევმა (რომელიც ასევე სახელმწიფო ნავთობკომპანია SOCAR-ის პრეზიდენტიცაა) თქვა, რომ გურბანოვი ერთხმად აირჩიეს. მან აღნიშნა, რომ გურბანოვი კლუბ „ყარაბაღის“ მთავარ მწვრთნელად ისევ დარჩება.

„წინა მთავარ მწვრთნელებთან ჩვენ, როგორც წესი, ორწლიან კონტრაქტს ვაწერდით ხელს. ახალ მთავარ მწვრთნელთან კი ხელი მოვაწერეთ ექვსწლიან კონტრაქტს, რომელიც სამ ციკლს მოიცავს“.

აბდულაევმა კონტრაქტის წვრილმანების გამხელაზე უარი განაცხადა:

„კონტრაქტის პირობაა – სამშობლოს სამსახური“.

თავად გურბანოვმა აზერბაიჯანის ფეხბურთის ფედერაციას ნდობისთვის მადლობა გადაუხადა.

„ეროვნულ ნაკრებთან მუშაობა ნებისმიერი მწვრთნელის ოცნებაა. ძნელი და საპასუხისმგებლო სამუშაოა. გულშემატკივართა მთელი ყურადღება ნაკრებისკენაა მიმართული. ყველას პირველი გუნდის წარმატება სურს. გვინდა, რომ წარმატებას მივაღწიოთ და შედეგები გავაუმჯობესოთ. ჩვენ გრძელვადიანი პროგრამა გვექნება, რომელსაც ეტაპობრივად განვახორციელებთ. სამუშაო ბევრი იქნება და ხელმძღვანელობასთან ერთად, გვსურს, რომ ამას გავუმკლავდეთ“, – ციტირებს გურბანოვის სიტყვებს ვებგვერდი azerisport.com.

კლუბ „ყარაბაღის“ ხელმძღვანელობამ თავისი მწვრთნელის ეროვნული ნაკრების მწვრთნელად დანიშვნას მხარი დაუჭირა – „არ მგონია, რომ ორ გუნდში მუშაობის შეთავსება ჩვენი კლუბის შედეგებზე უარყოფითად აისახოს. არ უნდა დაგვავიწყდეს, რომ ეროვნული ნაკრების ბირთვს სწორედ „ყარაბაღის“ მოთამაშეები შეადგენენ”, – თქვა აგდამის კლუბის დირექტორმა ემრაჰ ჩელიკელმა.