გენერალური ინსპექცია ბათუმში პოლიციის მიერ ლგბტ აქტივისტების შესაძლო ცემის ფაქტს სწავლობს

საქართველოს შინაგან საქმეთა სამინისტროს გენერალურმა ინსპექციამ თანასწორობის მოძრაობის აღმასრულებელი დირექტორის, ლევან ბერიანიძისა და ორგანიზაციის წევრის, თორნიკე კუსიანის, დაკავებისას პოლიციის მხრიდან შესაძლო ძალის გადამეტებაზე მოკვლევა დაიწყო. ამის შესახებ ონლიანგამოცემა On.ge-ს უწყებაში განუცხადეს.

შსს-ს ინფორმაციით, მიმდინარე წლის 25 აგვისტოს, გამთენიისას, ბათუმის ბულვარში, კლუბ “სოჰოს” მიმდებარე ტერიტორიაზე, დაუდგენელი პირები ერთმანეთს ფიზიკურ და სიტყვიერ შეურაცხყოფას აყენებდნენ. ადგილზე მისულ სამართალდამცველებს კი ბერიანიძე და კუსიანი არ დაემორჩილნენ.

“2 მოქალაქე, რომლებიც განსაკუთრებული აგრესიით გამოირჩეოდნენ, არ დაემორჩილნენ პოლიციელების კანონიერ მოთხოვნას, დაეცვათ წესრიგი, სამართალდამცველებს წინააღმდეგობა გაუწიეს” – შსს-ში აცხადებენ, რომ სწორედ ამის გამო დააკავეს აღნიშნული პირები, რომლებიც სამართალდამცველების სიტყვიერ შეურაცხყოფას პოლიციის განყოფილებაში გადაყვანის შემდეგაც განაგრძობდნენ.

შსს-ს ცნობით, ალკოტესტით შემოწმების შედეგად, კუსიანს და ბერიანიძეს ალკოჰოლური თრობა დაუდგინდათ.

დაკავებულები აცხადებენ, რომ მათ ჯერ უცნობმა პირებმა სცემეს ბათუმის ბულვარში, ხოლო შემდეგ მათზე ფიზიკური და სიტყვიერი შეურაცხყოფის მიყენება განყოფილებაში პოლიციამ განაგრძო. ბერიანიძემ და კუსიანმა ადვოკატს ასევე უთხრეს, რომ შსს-ს თანამშრომლები მათზე ფიზიკური ძალადობის ფაქტს შეესწრნენ და არაფერი მოიმოქმედეს. დაკავებულების თქმით, პოლიციელებმა მათ ჰომოფობიურ ნიადაგზე სცემეს.

“ორივე აცხადებს, რომ პოლიციის განყოფილებაში გადაყვანის დროს თანამშრომელმა მანქანაში სიტყვიერი შეურაცხყოფა მიაყენეს ჰომოფობიურ ნიადაგზე და ეუბნებოდნენ, რომ მათნაირები არ უნდა არსებობდნენ.

განყოფილებაში ყოფნის დროს ისინი პოლიციელებმაც სცემეს და სიტყვიერი შეურაცხყოფა მიაყენეს, მათ აიძულეს, რომ ტანსაცმელი გაეხადათ თითქოს შემოწმების მიზნით. რაც მათთვის დამამცირებელი იყო, ამბობს ადვოკატი”, – განაცხადა ადვოკატმა სალომე ღოღობერიძემ “ნეტგაზეთთან” საუბრისას.

მისივე თქმით, ბერიანიძეს და კუსიანს სხეულზე ნაკაწრები აღენიშნებათ. ბერიანიძეს ცხვირიდან აქვს სისხლდენა, თვალი აქვს ჩაშავებული, ხელებზე ეტყობა ძალადობის კვალი, მუხლებზე კანი აქვს დაზიანებული. თორნიკე კუსიანს კი თვალი აქვს ჩაშავებული და აცხადებს, რომ, ნეკნები და მხარი სტკივა ცემის გამო.

აღნიშნულ ფაქტზე გამოძიება საქართველოს სსკ-ის 126-ე მუხლით დაიწყო, რაც ძალადობას გულისხმობს.