გახდება თუ არა ნეიმარი ისტორიაში ყველაზე ძვირადღირებული ფეხბურთელი?

„ბარსელონას“ ფეხბურთელი ნეიმარი, შესაძლოა, ყველაზე ძვირადღირებული მოთამაშე გახდეს ფეხბურთის ისტორიაში, მაგრამ ამას ესპანეთის უმაღლესი ლიგა ეწინააღმდეგება.

ნეიმარი აპირებს პარიზულ კლუბ PSG-სთან მოაწეროს ხელი, სადაც მას წელიწადში 40 მილიონ ევროზე მეტი ხელფასი შესთავაზეს. მაგრამ იმისთვის, რომ ეს გეგმა განხორციელდეს, ჯერ მის ახლანდელ კლუბს უნდა გადაუხადონ კომპენსაცია. „ბარსელონასთან“ კონტრაქტის თანახმად, ეს თანხა 222 მილიონ ევროს შეადგენს.

PSG -მ განაცხადა, რომ მზადაა, ნეიმარის ტრანსფერში კომპენსაცია გადაიხადოს.

თუმცა, ამ გარიგების წინააღმდეგ ესპანეთის უმაღლესი ლიგა – LaLiga გამოვიდა. კანონით, კომპენსაცია სწორედ მან უნდა მიიღოს, ხოლო შემდეგ გადასცეს გამყიდველ კლუბს. ლიგამ ამაზე უარი თქვა და განაცხადა, რომ  PSG-ს ქმედებები უეფას ფეარ-ფლეის ფინანსურ წესებს არღვევს.

ამ წესების თანახმად, გუნდის წლიური ხარჯები მის შემოსავლებს 30 მილიონ ევროზე მეტით არ უნდა აჭარბებდეს. PSG-ს ადვოკატებმა ლიგის ქმედებებს უკანონო უწოდეს და განაცხადეს, რომ გაასაჩივრებენ მათ.

ამგვარად, ნეიმარის გადასვლის ფეხბურთის ისტორიაში რეკორდული გარიგების ბედი ჯერჯერობით ბუნდოვანია.  
ფრანგული PSG კატარელ ინვესტორებს ეკუთვნით. ამ სეზონზე კლუბმა განაცხადა, რომ ამბიციურ ამოცანას ისახავს – ჩემპიონთა ლიგაში გამარჯვებას.