გაეროს უშიშროების საბჭომ შეშფოთება გამოთქვა უკრაინის აღმოსავლეთში სიტუაციის ესკალაციის გამო

გაეროს უშიშროების საბჭომ ღრმა შეშფოთება გამოთქვა უკრაინის აღმოსავლეთში სიტუაციის საშიშად გამწვავების გამო, სადაც რამდენიმე დღეა გრძელდება შეტაკებები სამთავრობო ძალებსა და პრორუსულ ფორმირებებს შორის. საბჭომ კონფლიქტის მხარეებს ცეცხლის დაუყოვნებლივ შეწყვეტიკენ მოუწოდა.

„გეროს უშისროების საბჭოს წევრებმა დაგმეს  დონეცკის ოლქში დაპირისპირების ხაზზე მინსკის შეთანხმებებით აკრძალული შეიარაღების გამოყენება, რამაც ადამიანების, მათ შორის მშვიდობიანი მოსახლეობის, სიკვდილი და დაშავება გამოიწვია“, – ნათქვამია უკრაინის დელეგაციის ინიციატივით მიღებული, პრესისთვის განკუთვნილი განცხადების ტექსტში.

უშიშროების საბჭოს წევრებმა მხარეებს მოუწოდეს, დაუყოვნებლივ დაბრუნდნენ ცეცხლის შეწყვეტის რეჟიმში, სრული მხარდაჭერა გამოხატეს უკრაინის სუვერენიტეტისა და ტერიტორიული მთლიანობის მიმართ და ხაზგასმით აღნიშნეს კონფლიქტის დარეგულირებისთვის მინსკის შეთანხმებათა და გაეროს უშიშროების საბჭოს რეზოლუციის შესრულების მნიშვნელობა.

აშშ-ის სახელმწიფო დეპარტამენტმა ასევე შეშფოთება გამოხატა ავდეევკაში შექმნილი სიტუაციის გამო და მხარეებს ცეცლის დაუყოვნებლივ შეწყვეტისკენ მოუწოდა.

„დიდი ჰუმანიტარული კრიზისის თავიდან ასაცილებლად, მოგიწოდებთ ცეცხლის დაუყოვნებლივ შეწყვეტისკენ, ეუთო-ს დამკვირვებლებისთვის მდგრადი, სრული და დაუბრკოლებელი ხელმისაწვდომობის პირობების შესაქმნელად. ასევე ვადასტურებთ აშშ-ის მხრიდან მინსკის შეთანხმებათა სრულად შესრულების მხარდაჭერას“, – ნათქვამია განცხდებაში.

ავდეევკის რაიონში არც ღამით და არც 1 თებერვალს დილით ორმხრივი ცეცხლი არ შეწყვეტილა.  ორივე მხარე ახალი დანაკარგების შესახებ იუწყება. ბოლო ორი დღის განმავლობაში დაპირისპირების ხაზის ამ მონაკვეთზე შეიაღებული შეტაკებების რაოდენობამ მკვეთრად იმატა. ქალაქ ავდეევკაში  შუქის და გათბობის პრობლემა შეიქმნა. კიევის ხელისუფლება ჰუმანიტარულ კატასტროფაზე საუბრობს.

კონფლიქტის ბოლო გამწვავებასთან დაკავშირებით მინსკში დღეს სამმხრივი საკონტაქტო ჯგუფის შეხვედრა შედგება, რომელშიც  უკრაინის, რუსეთისა და ეუთოს წარმომადგენლები შედიან.

• გაეროს მონაცემებით, უკრაინის აღმოსავლეთში საბრძოლო მოქმედებების შედეგად 2014 წლის გაზაფხულიდან 2016 წლის სექტემბრამდე დაახლოებით 9,5 ათასი ადამიანი დაიღუპა. მოცემულ მომენტში კონფლიქტის ზონაში მოქმედებს ზავი, მინსკის შეთანხმებების შესაბამისად, რაც მხარეებს დაპირისპირების ხაზზე მძიმე შეიარაღების არსებობას უზღუდავს. რუსეთი ამ დრომდე კონფლიქტში თავის მონაწილეობას უარყოფს.