გაეროს ბიუჯეტი 285 მილიონი დოლარით შემცირდა

2018-2019 წლებში გაეროს ბიუჯეტი, წინა ორ წელიწადთან შედარებით, 285 მილიონი დოლარით ნაკლები იქნება, – იუწყება CNN. ეს იმ შემცირებაზე 85 მილიონი დოლარით მეტია, რასაც გაეროს გენერალური მდივანი ანტონიო გუტიერესი ოქტომბერში დაეთანხმა.

ამგვარ გადაწყვეტილებას ამერიკულმა მხარემ და პირადად გაეროში აშშ-ის მუდმივმა წარმომადგენელმა ნიკი ჰეილიმ გაუწია ლობირება.

„ჩვენ აღარ დავუშვებთ, რომ გაერომ ამერიკელების გულუხვობით ბოროტად ისარგებლოს“, – განაცხადა მან.

გაეროს ბიუჯეტი 2016-2017 წლებში 5,39 მილიარდ დოლარს შეადგენდა. ყველაზე დიდი შენატანი მასში აშშ-ს აქვს. ის, თუ როგორ შეიცვლება ახალ ბიუჯეტში გაეროს წილი, ცნობილი არ არის.

აშშ-სა და გაეროს შორის კონფლიქტი გამწვავდა 21 დეკემბერს, როდესაც ამ ორგანიზაციის წევრი ქვეყნების უმეტესობამ დონალდ ტრამპის მიერ იერუსალიმის ისრაელის დედაქალაქად აღიარების დაგმობას მისცა ხმა.

ამ კენჭისყრის წინ იმ ქვეყნებს, რომლებიც ტრამპის გადაწყვეტილების დაგმობას მიემხრობოდნენ, აშშ-ის პრეზიდენტი ფინანსური მხარდაჭერის შემცირებით დაემუქრა.