ბიძინა ივანიშვილი ხეების გადატანით “გართობას” აგრძელებს

საქართველოს ყოფილი პემიერ-მინისტრი ბიძინა ივანიშვლი საქართველოს შავი ზღვის სანაპროდან ასწლოვანი ხეების საკუთარ დენდროლიგიურ პარკში გადატანას აგრძელებს. ამ თემას ვრცელი სიუჟეტი “რუსთავი 2”-ის პროგრამა “P.S.” -მა მიუძღზვნა.

ოზურგეთის რაიონის სოფელ ნატანებში მცხოვრები ლადო სურმავას ეზოში, რომელიც ადგილობრივ სკოლაში ხელოვნების მასწავლებლად მუშაობს, 200 წლის ნედლ წიფელს ყოფილი პრემიერის დენდროლოგიურ პარკში გადასატანად ამზადებენ. როგორც გადაცემა „PS“-თან საუბრისას სურმავამ აღნიშნა, ხის სანახავად ივანიშვილი უცხოელ ექსპერტებთან ერთად იყო მოსული. „ექსპერტები ამბობდნენ,რომ ამ ხემ შეიძლება აღარც გაიხაროს სხვა ნიადაგზე ან გადატანის პროცესში დაზიანდესო, მაგრამ ივანიშვილმა არ დაუჯერა“-განაცხადა სურმავამ. ყოფილ პრემიერს ასწლოვანი ნედლი წიფელის შეძენა $ 5 000 დაუჯდა.

შეკვეთილში ბიძინა ივანიშვილის დენდროლოგიურ პარკში გადასატანად კიდევ ერთი ასწლოვანი ევკალიპტის ხე მზადდება. ურეკში სოფელ წვერმაღალაში გიგანტური ევკალიპტის გადატანის სამუშაოები უკვე დაწყებულია. ყოფილ პრემიერს კი ასწლოვანი ხის გადატანა მეპატრონისთვის მხოლოდ კომპიუტერის ჩუქების ფასი დაუჯდა.

ხეების გადატანის პროცესში ვერანაირ პრობლემას ვერ ხედავს გარემოს დაცვის მინისტრი გიგა აგულაშვილი. როგორც ტელეკომპანია რუსთავი 2-თან საუბრისას მინისტრი აცხადებს, სამინისტროს ის ტერიტორია არ შეუმოწმებია, საიდანაც ხეები უკვე გადაიტანეს. აგულაშვილი ამბობს, რომ შესწავლა მოხდება მხოლოდ იმ შემთხვევაში, თუკი რაიმე დარღვევა მოხდება.

ტელეკომპანიამ ის ადგილები გადაიღო, სადაც ადრე ასწლოვანი ხეები იდგა. ისინი ხელუხლებლად არის დატოვებული – აქ არც მიწა დაუყრიათ და არც ნიადაგი აღუდგენიათ. ბიოლოგი ირაკლი მაჭარაშვილი ამბობს, რომ 1 სანტიმეტრი ნაყოფიერი ნიადაგის შექმნას დაახლოებით ასი წელი სჭირდება და ამ შემთხვევაში, როდესაც ასწლოვანი ხეების სრულიად ამოღება ხდება, იქ არსებული მიწა უკვე გამოუსადეგარია.

მაჭარაშვილი აღნიშნავს, რომ საქართველოს კანონმდებლობის მიხედვით, თუ გარემოზე მიყენებული ზიანი ათას ლარს აჭარბებს, სისხლის სამართლის პასუხისმგებლობა დგება. იმ ადგლებში კი, საიდანაც ხეები ამოიღეს, ზარალი აშკარად უფრო დიდია.

ათობით ხე იჩეხება ჩაქვშიც, სადაც ბიძინა ივანიშვილის პარკში გადასატანად ორ ასწლოვან ხეს ამზადებენ. ამ სამუშაოებისთვის მორღვეულია ნაპირდამცავი ჯებირი და ჩაკეტილია მოსახლეობისთვის ზღვამდე მისასვლელი ერთადერთი გზა.

თავად ბიძინა ივანიშვილმა რამდენიმე თვის წინ ტელეკომპანია იმედისთვის მიცემულ ინტერვიუში თქვა, რომ გიგანტური ხეები მისი ჰობია. „ჩემი ჰობია და ძალიან მიყვარს დიდი ხეები, გიგანტური ხეები არის ჩემი ერთ-ერთი გასართობი“-განაცხადა ივანიშვილმა.

ასწლოვანი ხეების ყოფილი პრემიერის პარკში გადატანის პროცესში:

• საათების განმავლობაში გადაკეტილია ბათუმი-ქობულეთის შემაერთებელი გზა;

• შეჩერებული რკინიგზა და დროებით აყრილი ლიანდაგები;

• ჩაჭრილი ელექტროსადენები;

• ასობით მოჭრილი ხე;

• ამოღებული ასწლოვანი ხეების ადგილას დარჩენილი ღრმულები,რომლებიც აღდგენას არ ექვემდებარება;

• ტელეკომპანია რუსთავი 2-ის ინფორმაციით აჭარისა და გურიის რეგიონებიდან ამ დროისთვის მთლიანობაში 11 ხეს ამზადებენ ყოფილი პრემიერის დენდროლოგიურ პარკში გადასატანად.

პირველი ხე, რომელიც ბიძინა ივანიშვილმა საკუთარ პარკში აჭარიდან გადაიტანა, 650 ტონიანი გიგანტური ტიტის ხე იყო.