ბაქოში იმ რესტორნების დაჯარიმება დაიწყეს, რომლებიც ჰაერს აბინძურებენ

აზერბაიჯანის ეკოლოგიისა და ბუნებრივი რესურსების სამინისტრომ იმ რესტორნების დაჯარიმება დაიწყო, სადაც ბოლის გამწოვი დანადგარები არ აქვთ.

წლევანდელი წლის მაისში ბაქოში რესტორნები გააფრთხილეს, რომ მათ სექტემბრამდე ასეთი დანადგარების შეძენა მოუწევდათ. მაგრამ, როგორც Report  იუწყება, 88 რესტორანს ეს აქამდე არ გაუკეთებია.

საქმეს ხელი ეკოლოგიის სამინისტრომ მოჰკიდა: ამ სამინისტროს წარმომადგენლები რეიდების დროს ზომავენ, თუ რამდენად აბინძურებს რესტორნის ბოლი ატმოსფეროს, და ამასთან შესაბამისობაში უწერენ ჯარიმებს, საშუალოდ  – 3500 მანათის (დაახლოებით 2058 დოლარის) ოდენობით.

რეიდები არამხოლოდ რესტორნებს შეეხო, არამედ ეგრეთ წოდებულ „საზეიმო სახლებს“. ეს არის რესტორნის ტიპის საგანგებო დაწესებულებები უზარმაზარი, ასობით ადამიანზე გათვლილი დარბაზებით, ქორწილების გადასახდელად. აზერბაიჯანულ ქორწილს კი გრანდიოზული სუფრა ახლავს. ასე რომ, ეს „საზეიმო სახლები“ განსაკუთრებით ძლიერად ბოლავს.

როგორც ეროვნული დეპარტამენტის გარემოს მონიტორინგის დირექტორი რამალ ბაგიროვი ამბობს, სამინისტრომ გადაწყვიტა, „ჰუმანიზმი გამოავლინოს“ და ჯარიმისგან გაათავისუფლოს ის რესტორნები, რომლებმაც გამწმენდი ფილტრი ჯერ ვერ დააყენეს , თუმცა მიმწოდებლებთან შეთანხმება უკვე დადეს და დანადგარების მიტანას ელოდებიან. თუკი ისინი ფილტრებს მაინც არ დააყენებენ, მათ უკვე ათობით ათასი მანათის გადახდა მოუწევთ.

ეკოლოგიის სამინისტროს წარმომადგენლის ირადა იბრაგიმოვას თქმით, ის ბოლი რომელიც ზოგიერთი რესტორნის მილებიდან ამოდის, ჰაერს ძლიერ აბინძურებს, და გარშემო მცხოვრებ ადამიანებს დისკომფორტს უქმნის. ხოლო ასეთი რეიდების მთავარი მიზანი – ამ რესტორნების დასჯა კი არ არის, არამედ ამ პრობლემის საბოლოოდ აღმოფხვრა. „საქმე მხოლოდ ციფრებს რომ ეხებოდეს, არანაირ წინასწარ გაფრთხილებას არ მივცემდით“, – დასძენს იბრაგიმოვა.