ბაქოში ბლოგერ ლაპშინს ასამართლებენ: პროკურორმა 6,5 წელი მოითხოვა

12 ივლისს ბაქოს განსაკუთრებით მძიმე დანაშაულთა სასამართლოს მორიგ სხდომაზე სახელმწიფო ბრალმდებელმა ნასირ ბაირამოვმა ბლოგერ ალექსანდრ ლაპშინისთვის ექვსნახევარი წლით თავისუფლების აღკვეთა და ამ ვადის საერთო რეჟიმის კოლონიაში მოხდა მოითხოვა.

ლაპშინს მთიან ყარაბაღში უკანონოდ ჩასვლა და აზერბაიჯანის ხელისუფლების საწინააღმდეგო მოწოდებების გავრცელება ედება ბრალად. სისხლის სამართლოს კოდექსით, ამ მუხლებისთვის სასჯელის მაქსიმალურ ვადად რვა წელია განსაზღვრული.

პროკურორმა დასძინა, რომ სასჯელის მოხდის შემდეგ ლაპშინი აზერბაიჯანიდან უნდა გააძევონ.

ბრალდებულის ადვოკატმა ედუარდ ჩერნინმა სასამართლოს წინა სხდომაზე განაცხადა, რომ მისი დაცვის ქვეშ მყოფის ბრალი დაუდასტურებლად მიაჩნია. მან მტკიცებულებების სიიდან ბრალდების მხარის ათივე მოწმის ჩვენებების ამოღების შესახებ დააყენა შუამდგომლობა.

“მოწმედ გამოსული ადამიანი, მოცემული სისხლის დანაშაულებრივი ქმედების უშუალო ან არაპირდაპირ მოწმეს უნდა წარმოადგენდეს. მაგრამ ეს მოწმეები ლაპშინის რაიმე ქმედების თვითმხილველები არ ყოფილან. მათ თქვეს, რომ მისი ქმედებების შესახებ ინტერნეტიდან და მასობრივი საინფორმაციო საშულებებიდან შეიტყვეს. შუშის რაიონიდან იძულებით გადასახლებული მოწმეები კი იმ ტანჯვა-წამებაზე ლაპარაკობდნენ, რაც მათ ყარაბაღის ომის შედეგად მიადგათ. მაგრამ ეს ომი ჩვენს დროში ხდებოდა და მისი მოწმედ ყოფნა ყველას შეგვიძლია. ამიტომ, იმის გათვალისწინებით, რომ ამ მოწმეთა ჩვენებები ლაპშინისთვის წაყენებული ბრალდების არსს არ ეხება, გთხოვთ ისინი მტკიცებულებათა სიიდან ამოიღოთ”, – ციტირებს ადვოკატის სიტყვებს “კავკაზსკი უზელი”.

პროკურორის საბრალდებო სიტყვის შემდეგ ადვოკატმა ჩერნინმა სასამართლოს თავისი გამოსვლის მოსამზადებლად დრო სთხოვა. მომდევნო სხდომა 19 ივლისისთვის არის ჩანიშნული.

“თავხედი ბლოგერის” შესახებ დაწვრილებით შეგიძლიათ JAMnews-ის მასალაში წაიკითხოთ:

64669647_2690191617674859_7579334379298619392_n