ბაქოს სასამართლომ საქართველოში გაუჩინარებულ ჟურნალისტს აფგან მუხტარლის სამთვიანი წინასწარი პატიმრობა შეუფარდა

31 მაისს ბაქოს საბალიისკის რაინულმა სასამართლომ ორი დღის წინათ თბილისში გაუჩინარებული აზერბაიჯანელი ჟურნალისტის, აფგან მუხტარლის სამი თვით წინასწარ პატიმრობაში დატოვების გადაწყვეტილება მიიღო. მუხტარლი ბოლო სამი წლის განმავლობაში საქართველოში ცხოვრობდა და უკანასკნელ ხანს აზერბაიჯანის ხელისუფლების მხრიდან მის მიმართ მზარდი ზეწოლის შესახებ ლაპარაკობდა.

ელჩინ სალდიგოვმა, რომელიც სასამართლოში აფგან მუხტარლის ინტერესებს იცავდა, საინფორმაციო სააგენტო “ტურანს” აცნობა, რომ ჟურნალისტს ახალი ბრალი წაუყენეს – კერძოდ, მესაზღვრის მიმართ ძალის გამოყენებით წინააღმდეგობის გაწევა.

ადრე აზერბაიჯანის გენერალური პროკურატურა იუწყებოდა, რომ მუხტარლის წინააღმდეგ, შესაძლოა, წაყენებული იყოს საზღვრის უკანონო გადაკვეთისა და ვალუტის ( 10 ათასი ევრო) არალეგალურად გადატანის ბრალდებები.

ადვოკატის თქმით, მუხტარლი ჰყვება, რომ მის დამკავებლებს საქართველოს კრიმინალური პოლიციის ფორმები ეცვათ.

მუხტარლიმ ასევე დასძინა, რომ ეს მესაზღვრე სასაზღვრო პუნქტთან მისვლამდე არასდროს ენახა. მუხტარლი ირწმუნება, რომ ის სასაზღვრო კონტროლის პუნქტებიდან გაიყვანეს საქართველოს და აზერბაიჯანის მხარესაც. ადვოკატმა თქვა, რომ დაცვა მის დაპატიმრებას გაასაჩივრებს.