ბათუმში ხანძარს საქართველოს ათი და ირანის ერთი მოქალაქე ემსხვერპლა

შინაგან საქმეთა სამინისტროს ინფორმაციით, ბათუმში, სასტუმრო ლეოგრანდში გაჩენილი ხანძრის შედეგად, გარდაცვლილია 11 ადამიანი, მათ შორის 10 საქართველოს, 1 კი ირანის რესპუბლიკის მოქალაქეა.

“ხანძრის შედეგად კლინიკაში გადაყვანილი იყო 21 პირი, მათგან 3 უკვე გაწერეს. კლინიკაში რჩება 18 პირი, მათგან 1 ისრაელის მოქალაქეა, 5 თურქეთის, დანარჩენი კი საქართველოს” – აცხადებს აჭარის ჯანდაცვის მინისტრი, ზაალ მიქელაძე.

მომხდარ ფაქტთან დაკავშირებით გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს.

ბათუმში, სასტუმრო ლეოგრანდში ხანძარი 24 ნოემბერს, დაახლოებით 20 საათზე გაჩნდა, ძლიერი კვამლი მალევე მოედო მთელ შენობას. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის იყვნენ როგორც სტუმრები, ასევე სასტუმროს თანამშრომლები.

ხანძრის სალიკვიდაციო და სამაშველო სამუშაოებში მონაწილეობდა: 17 სახანძრო-სამაშველო ჯგუფი, 120 მეხანძრე-მაშველი, ხანძარსაწინააღმდეგო და სამაშველო ტექნიკასთან ერთად, აჭარის, გურიის და სამეგრელოს რეგიონებიდან, აჭარის პოლიციის დეპარტამენტის და საპატრულო პოლიციის დეპარტამენტის აჭარის მთავარი სამმართველოს 200-მდე თანამშრომელი და განსაკუთრებულ დავალებათა დეპარტამენტის წარმომადგენლები.