აშშ რუსეთის წინააღმდეგ სანქციებს ამკაცრებს

აშშ-ის სენატორებმა რესპუბლიკური და დემოკრატიული პარტიებიდან რუსეთის წინააღმდეგ სანქციების საკითხთან დაკავშირებით შეთანხმებას მიაღწიეს. შეთანხმების არსი ის არის, რომ მიიღებენ საგანგებო კანონს, რომელიც აშშ-ის პრეზიდენტს უკვე დაწესებული სანქციების გაუქმების ან შერბილების უფლებას არ აძლევს. აქამდე ეს სანქციები პრეზიდენტის ბრძანებულებით წესდებოდა, და ასევე ხდებოდა მათი გაუქმება ან შერბილება.

სანქციები პრეზიდენტ ობამას დროს იმ რუსი მოქალაქეების მიმართ დაწესდა, რომლებსაც აშშ-ში კიბერშეტევების, სირიაში იარაღის მიწოდების, ადამიანის უფლებების დარღვევისა და უკრაინასთან მიმართებით აგრესიული ქმედებების მონაწილეებად მიიჩნევენ.

სენატორმა ბობ კორკერმა ამგვარი შეთანხმების მიღწევის შესახებ განაცხადა და აღნიშნა, რომ მომავალში სანქციები სასარგებლო წიაღისეულის მოპოვების, მაღალი ტექნოლოგიებისა და სატრანსპორტო გადაზიდვების სფეროშიც შეიძლება გამკაცრდეს.

შეგახსენებთ, რომ რუსეთთან უფრო მეგობრული ურთიერთობის დამყარება პრეზიდენტი ტრამპის ერთ-ერთი წინასაარჩევნო დაპირება იყო. რუსეთის ოფიციალურ პირებს ასევე არაერთხელ განუცხადებიათ, რომ მისი გამარჯვების შემთხვევაში, ურთიერთობის გაუმჯობესებას იმედოვნებდნენ.