აშშ-მა რუსეთი შეიარაღების შემცირების შესახებ შეთანხმების დარღვევაში დაადანაშაულა

აშშ-მა რუსეთი შეიარაღების შემცირების შესახებ შეთანხმების დარღვევაში დაადანაშაულა. პენტაგონში განაცხადეს, რომ რუსეთმა სახმელეთო ბაზირების ფრთოსანი რაკეტების სისტემა განალაგა, რაც შუალედური და მოკლე დამიზნების რაკეტების განადგურების შესახებ 1987 წელს მიღწეული შეთანხმების დარღვევაა.

აშშ-ის ჯარის შტაბების მეთაურთა კომიტეტის ვიცე-თავმჯდომარის პოლ სელვის თქმით, მოსკოვის ქმედებები ევროპაში არსებული ნატოს ობიექტების უმრავლესობისთვის რისკს წარმოადგენს.

ამ საკითხთან დაკავშირებით განცხადება გააკეთა აშშ-ს სახელმწიფო დეპარტამენტმაც. „ ვფიქრობთ, რომ რუსეთი შუალედური და მცირე დამიზნების რაკეტების შეთანხმების თაობაზე საკუთარ ვალდებულებებს ძველებურად არღვევს“, – თქვა სახელმწიფო დეპარტამენტის ოფიციალური წარმომადგენლის მოვალეობების შემსრულებელმა მარკ ტონერმა.

თებერვლის შუა რიცხვებში გაზეთი The New York Times იმის შესახებ წერდა, რომ რუსეთი, შეთანხმების მიუხედავად, უკვე რამდენიმე წელია, ამუშავებს და ცდის რაკეტა SSC-8-ს, რომელიც ფრთოსანი რაკეტა “Калибр-НК”-ს სახმელეთო ანალოგს წარმოადგენს.

რუსეთის ფედერაციის პრეს-მდივანმა დმიტრი პესკოვმა მაშინ ეს ინფორმაცია უარყო. მისი თქმით, რუსეთი საკუთარი საერთაშორისო ვალდებულებების ერთგული რჩება.

შუალედური და მოკლე დამიზნების რაკეტების განადგურების შესახებ უვადო შეთანხმება 1988 წელს შევიდა ძალაში. აშშ-მა და სსრკ-მ, შემდეგ კი რუსეთმა, როგორც მისმა სამართალმემკვიდრემ, ვალდებულება აიღეს, რომ არ ეწარმოებინათ და არ გამოეცადათ სახმელეთო ბაზირების 500-დან 5500-მდე კილომეტრიანი დამიზნების ბალისტიკური და ფრთოსანი რაკეტები.