აშშ-ის სახელმწიფო მდივანმა რუს კოლეგასთან პირველივე შეხვედრაზე უკრაინის საკითხი წამოჭრა

აშშ-ის სახელმწიფო მდივნის რექს ტილერსონისა და რუსეთის საგარეო საქმეთა მინისტრის სერგეი ლავროვის შეხვედრა ბონში „დიდი ოცეულის“ ქვეყნების საგარეო საქმეთა მინისტრების კონფერენციის ფარგლებში, 16 თებერვალს შედგა. როგორც შეხვედრის შემდეგ რექს ტილერსონმა განაცხადა, შეხვედრის დროს მან მოსკოვს მინსკის შეთანხმების შესრულებისა და უკრაინის კონფლიქტის დარეგულირებისკენ მოუწოდა. ლავროვთან საუბარს მან „პროდუქტიული“ უწოდა.

„ჩვენ ვიმსჯელეთ რიგ საკითხებზე, რომლებიც საერთო ინტერესებში შედის… როგორც სენატში თანამდებობაზე ჩემს დამტკიცებასთან დაკავშირებულ მოსმენაზე მკაფიოდ განვაცხადე,  ჩვენ რუსეთთან ისეთ საკითხებში თანამშრომლობის შესაძლებლობებს განვიხილავთ, რომლებშიც თანამშრომლობის პრაქტიკული ასპექტების გამონახვას შევძლებთ და რაც ამერიკელი ხალხის კეთილდღეობას მოემსახურება“, – ნათქვამია თეთრი სახლის ვებგვერდზე გამოქვეყნებულ ტილერსონის  განცხდებაში.

„იმ საკითხებში, რომლებთან დაკავშირებითაც ჩვენი შეხედულებები არ ემთხვევა, აშშ-ისა საკუთარ და მისი მოკავშირეების ინტერესებს დაიცავს. ამავდროულად, რადგან ჩვენ შეხების წერტილებსაც ვეძებთ, მოველით, რომ  რუსეთი მინსკის შეთანხმებით გათვალისწინებულ თავის ვალდებულებებს შეასრულებს და უკრაინაში არსებული ძალადობის დეესკალაციაზე იმუშავებს“, – აღნიშნა სახელმწიფო მდივანმა.

როგორც თავის მხრივ სერგეი ლავროვმა განაცხადა, რუსეთმა და აშშ-მ დაადასტურეს საერთო ინტერესების არსებობა, უპიველეს ყოვლისა – ტერორიზმთან ბრძოლის საკითხში.

„გასაგებია, რომ ყველა პრობლემის გადაჭრას ვერ შევძლებდით. ვფიქრობ, რომ ორი ამხელა ზესახელმწიფოს შორის, როგორიც აშშ და რუსეთი არიან, ყველა  საკითხს ვერასდროს გადავჭრით, თუმცა ჩვენ საერთო მიდგომა გვაქვს იმ საკითხებთან დაკავშირებით, სადაც ჩვენი ინტერესები ემთხვევა, – ასეთი სფერო კი ცოტა არაა, – ჩვენ წინ უნდა ვიაროთ“, – დასძინა სერგეი ლავროვმა.

მისი თქმით, ამერიკელ კოლეგასთან ერთად მათ „ავღანეთსა და უკრაინაში არსებულ სიტუაციაზე იმსჯელეს“ და „ყველა ამ მიმართულებით ჩვენი ამერკელი პარტნიორები დაინტერესებულები არიან, რომ იმ ძლისხმევაში ჩაერთონ, რაც ამ კონფლიქტების გადაჭრისთვის ტარდება“.

შეგახსენებთ  –  როგორც რამდენიმე დღის წინათ თეთრი სახლის პრეს-მდივანმა შონ სპაისერმა განაცხადა, დონალდ ტრამპი მოელის, რომ რუსეთი „ყირიმს დააბრუნებს“ და უკრაინის კონფლიქტის დეესკალაციას დაიწყებს.