ამერიკელი ჩინოვნიკების კომპიუტერებს რუსული კომპანია აღარ დაიცავს

აშშ-ის პრეზიდენტმა დონალდ ტრამპმა ხელი მოაწერა ბრძანებულებას, რომელიც ამერიკის სახელმწიფო მოხელეებს „კასპერსკის ლაბორატორიის“ პროგრამული უზრუნველყოფით სარგებლობას უკრძალავს. ჩინოვნიკები ვალდებულნი არიან, სამი თვის განმავლობაში შეცვალონ პროგრამული უზრუნველყოფა.

ამერიკულ სპეცსამსახურებს, უკვე დიდი ხანია, ეჭვი აქვთ, რომ „კასპერსკის ლაბორატორიას“ რუსულ სპეცსმსახურებთან აქვს კავშირი. კომპანიის ხელმძღვანელობამ ეს ბრალდებები არაერთხელ უარყო.

„კასპერსკის ლაბორატორია“ –  ანტივირუსული კომპიუტერული პროგრამების ბაზარზე ერთ-ერთი უმსხვილესი კომპანიაა. კომპანიის ცენტრალური ოფისი მოსკოვში მდებარეობს.

მისი მთავარი პროდუქტი – „კასპერსკის ანტივირუსი“ – კომპიუტერს ვირუსებისგან, სპამისგან და ჰაკერული შეტევებისგან იცავს. ამრიკის ხელისუფლება მრავალი წლის განმავლობაში სარგებლობდა „ლაბორატორიის“ მომსახურებით.

აშშ-ში, უკვე წელიწადზე მეტი ხანია, მიმდინარეობს გამოძიება 2016 წლის არჩევნებში რუსეთის ხელისუფლების სავარაუდო ჩარევის თაობაზე. 2016 წლის ზაფხულში, წინასაარჩევნო რბოლის შუაგულში აშშ-ის დემოკრატიული პარტიის სერვერები გატეხეს და დონალდ ტრამპის მთავარი მეტოქის – ჰილარი კლინტონის სამუშაო მიმოწერა გამოაქვეყნეს. ამერიკული სპეც-სამსახურები ვარაუდობენ, რომ ჰაკერული შეტევა კრემლის მიერ იყო სანქცირებული.

2017 წლის ნოემბრის დასაწყისში კომპანიებმა  Facebook-მა, Google-მა და Twitter-მა განაცხადეს, რომ რუსეთის სპეც-სამსახურები სოციალური ქსელების საშუალებით ამერიკის არჩევნებზე გავლენის მოხდენას ცდილობდნენ.