აზერბაიჯანში დევნილები უკმაყოფილოები არიან მრიცხველების იძულებით დადგმის გამო

1 თებერვალს ყარაბაღიდან დევნილთა და იძულებით გადასახლებულ პირთა ჯგუფსა და სახელმწიფო უწყება „აზერიშიგს“ შორის, მრიცხველების იძულებით დადგმის გამო არსებული უკმაყოფილების ნიადაგზე, დაპირისპირება წარმოიშვა.

სოციალურ ქსელებში გაჩნდა ცნობები იმის შესახებ, რომ ზოგიერთ შემთხვევაში პროტესტი ჩხუბში გადაიზარდა, თუმცა „აზერიშიგის“(აზერშუქი) პრეს-სამსახური ამ ცნობებს უარყოფს.

აქციის დასაშოშმინებლად დაბაში პოლიციის დამატებითი ძალები გადაისროლეს.

აქციები დაბა გიზილგუმსა და პიშაგიში ჩატარდა, ბაქოდან 20 კმ-ის მოშორებით. აქ 1990-იანი წლების დასაწყისიდან ყოფილ სანატორიუმებში ცხოვრობენ მთიანი ყარაბაღიდან და მის გარშემო ოკუპირებული ტერიტორიებიდან იძულებით გადასახლებული ადამიანები.

„აქამდე ჩვენს დაბებში მთელი დღე-ღამით, კვირეებით არ იყო ხოლმე სითბო, ყოველთვის იყო პრობლემები. ჩვენთვის სითბოს ერთადერთი წყაროა ელექროობა. და დღეს, ასეთ ყინვიან ამინდში მოვიდნენ ელექტრიკოსები და ჩვენთვის ელექტროენერგიის რამდენიმე დღით გამორთვას აპირებენ, ვიდრე ყველა მრიცხველს არ დადგამენ. ხოლო ჩვენთვის გამოყოფილი 36 მანათი (დაახლოებით 18 ევრო-რედ.) ჩვენს ხარჯებს ნამდვილად ვერ აანაზღაურებს. ეს თანხა ათ დღესაც არ გვეყოფა“, – გადმოსცემს ერთ-ერთი მაცხოვრებლის სიტყვებს „რადიო აზადილგი“

„აზერიშიგის“ პრესამსახური უარყოფს ინფორმაციას დევნილებსა და მის თანამშრომლებს შორის მომხდარი ჩხუბის შესახებ. „ინფორმაცია იმის შესახებ, თითქოს კომპანიის ასობით თანამშრომელი იყო დაკავებული მრიცხველების დადგმით, ასევე არ შეესაბამება სინამდვილეს. სხვადასხვა ინერნეტ-რესურსის მიერ ამგვარი ინფორმაციის გავრცელება საზოგადოების შეცდომაში შეყვანას ემსახურება“, – ნათქვამია „აზერიშიგის“ პრეს-სამსახურის განცხადებაში.

დევნილებისთვის ელექტრომრიცხველების დადგმა აზერბაიჯანის პრეზიდენტის ილჰამ ალიევის 2017 წლის 23 იანვრის ბრძანებულების შესაბამისად დაიწყო. მხოლოდ ბოლო დღეების განმავლობაში 5700 მრიცხველი დაიდგა, ნათქვამია „აზერიშიგის“ განცხადებაში.

მანამდე დევნილები და იძულებით გადასხლებული პირები, დადგენილი ლიმიტების ფარგლებში, გათავისუფლდნენ კომუნალური მომსახურების საფასურის გადახდისგან.