არქივი- 22.01.2018

აზერბაიჯანი მხარს უჭერს სირიაში თურქეთის სპეცოპერაციას

„აზერბაიჯანი სრულად აცნობიერებს უსაფრთხოების შესახებ თურქეთის საფუძვლიან შეშფოთებას ტერორისტული მუქარის შესახებ“, – ასეთი კომენტარი გააკეთა აზერბაიჯანის საგარეო საქმეთა სამინისტროს პრეს-სამსახურის ხელმძღვანელმა, ხიკმეტ გაჯიევმა, სირიის ტერიტორიაზე თურქეთის არმიის ოპერაციაზე ინფორმაციის შესახებ.

აზერბაიჯანის საგარეო საქმეთა სამინისტროს პრეს-სამსახურის ხელმძღვანელმა დაამატა, რომ თურქეთმა ტერორისტული აქტი არაერთხელ იწვნია და შედეგად უამრავი უდანაშაულო ადამიანი დაიღუპა.

„ჩვენ მოძმე თურქეთს და თურქ ხალხს ვუსურვებთ აღარასდროს განეცადოთ ვერაგული ტერორისტული აქტები“ – თქვა გაჯიევმა.

21 იანვარს, თურქეთის არმიამ დაიწყო ოპერაცია „ზეთისხილის რტო“ და მეზობელი სირიის ტერიტორიაზე თითქმის 8 კილომეტრით წინ წაიწია. თურქული ძალების მთავარი მოწინააღმდეგე „ქურთთა თავდაცვის ძალების“ დანაყოფებია. ანკარაში დარწმუნებულნი არიან, რომ ეს დაჯგუფება დაკავშირებულია თვით თურქეთში, აშშ-სა და ევროსაბჭოში ტერორისტულ ორგანიზაციად გამოცხადებულ ქურთისტანის მუშათა პარტიასთან. საერთო ჯამში ოპერაციაში დაახლოებით 6.5 ათასი თურქი ჯარისკაცია ჩართული.

აშშ-მ და ირანმა დაგმეს სირიაში თურქეთის ოპერაცია. რუსეთის საგარეო საქმეთა მინისტრმა სერგეი ლავროვმა განაცხადა, რომ „თურქეთი განარისხა სირიაში აშშ-ს ცალმხრივმა მოქმედებებმა“.