აზერბაიჯანის ვიცე-პრემიერის შვილიშვილს ექვსი წლით პატიმრობა მიესაჯა

21 წლის ნაილ ალაჰვერდიევს, აზერბაიჯანის მთავრობის ვიცე–პრემიერის, ალი ჰასანოვის შვილიშვილს ექვსი წლით პატიმრობა მიესაჯა.

განაჩენი ბაქოს მძიმე დანაშაულებათა სასამართლომ გამოიტანა.

ალაჰვერდიევმა 2017 წლის 3 აგვისტოს ჰეიდარ ალიევის გამზირზე “Mercedes-Gelandawagen“-ის მარკის ავტომობილით მძიმე საავტომობილო ავარია მოახდინა – შედეგად ორი ადამიანი დაიღუპა და თურქეთის ორმა მოქალაქემ სახვადასხვა სიმძიმის დაზიანებები მიიღო.

დაწვრილებით – JAMnews–ის მასალაში.

23380019_10214440631994716_3078113112096473170_n

სასამართლოზე დაღუპულთა ნათესავებმა განაცხადეს, რომ მათ ბრალდებულის მიმართ არანაირი პრეტენზია არ აქვთ. თავად ალაჰვერდიევი რბოლის შესახებ ბრალდებას უარყოფდა. ის ამტკიცებდა, რომ მანქანას მაღალი სიჩქარით მართავდა, რადგან გვერდით მჯდომი მგზავრი უცბად შეუძლოდ გახდა და ჩქარობდა, რომ ის საავადმყოფოშო სწრაფად მიეყვანა.

თურქეთის მოქალაქეებმა სასამართლოში წერილი გაგზავნეს, რომ ბრალდებულისადმი პრეტენზია არც მათ ჰქონდათ. მათი მკურნალობის ყველა ხარჯი საკუთარ თავზე აიღო ალაჰვერდიევის ბაბუამ, დევნილთა და იძულებით გადასახლებულ პირთა საქმეების სახელმწიფო კომისიის თავმჯდომარემ ალი ჰასანოვმა.

სასამართლოს მიერ გამოტანილმა განაჩენმა საზოგადოებაში არაერთგვაროვანი რეაქცია გამოიწვია: სოციალური ქსელების კომენტატორები წერენ, რომ ასეთი მძიმე დანაშაულისთვის ექვსი წელი ძალიან ცოტაა, ზოგიერთი დარწმუნებულიც კი არის, რომ „ოქროს ბიჭი“ საერთოდ არ ჩაჯდება საკანში, უბრალოდ პერიოდულად აღინიშნება ხოლმე.

აზერბაიჯანის უფლებადამცველი ცენტრის დირექტორმა ელდარ ზეინალოვმა ვებგვერდ minval.az–ს განუცხადა, რომ „კანონის თანახმად, საგზაო მოძრაობის დარღვევა და სატრანსპორტო საშუალების გაუფრთხილებლობით გამოყენება, რასაც ორი ან მეტი ადამიანის დაღუპვა მოჰყვება, ხუთიდან ათ წლამდე თავისუფლების აღკვეთითა და ხუთი წლით სატრანსპორტო საშუალების მართვის უფლების ჩამორთმევით ისჯება. ასე რომ, სასჯელი თითქმის მინიმალური იყო“.