ადგილობრივი და ჩამოსული რობოტები გამოფენაზე

ერევანში გაიხსნა გამოფენა ‘რობოტების მარში’.

აქ შეგიძლიათ გაიცნოთ რობოტი ბორისი, რომელიც არამხოლოდ თავაზიანად ესალმება სტუმრებს, არამედ გოგონებისთვის კომპლიმენტებსაც არ იშურებს და მათთვის ცეკვავს კიდეც.

ღონისძიების ორგანიზატორები, კომპანია ‘Корпорация роботов’ და ბანკი ‘ამერია’, ერევნელ ბავშვებსა და მათ მშობლებს წარუდგენენ ოცზე მეტ ინტერაქტიულ რობოტს, რომლებიც სხვადასხვა ქვეყნიდან ჩამოიტანეს. აქვე იქნება წარმოდგენილი სომხეთში შექმნილი საუკეთესო რობოტებიც.

ექსკურსიამძღოლები დამთვალიერებლებს თითოეული რობოტის შესაძლებლობებს აცნობენ; განსაკუთრებულ ყურადღებას კი ახალგაზრდა თაობას აქცევენ. პროექტის მიზანია რობოტექნიკის განვითარება; ამიტომ, ბავშვებს აქ საშუალება ეძლევათ, რობოტებთან ერთად ჩოგბურთი, კალათბურთი და ფეხბურთი ითამაშონ. ასევე, შეუძლიათ დააკვირდნენ რობოტების ოინებს, მათ მიერ კოქტეილების დამზადებისა და კლიენტის მაგიდასთან მიტანის პროცესს. დამთვალიერებლები გაიცნობენ მოცეკვავე და ძიძა რობოტებს. აქვე შეიძლება მასტერკლასების გავლაც, სადაც დამთვალიერებლებს რობოტის საკუთარი ხელით აწყობას ასწავლიან.

გამოფენის ერთ-ერთი ყველაზე პოპულარული ექსპონატია ხის რობოტი ‘დერევიაკა’, რომელიც ოცნებობს, გახდეს რკინის და ამისთვის ფულს აგროვებს. ძუნწებს ლანძღავს, გულუხვებისთვის კი არღანზე უკრავს.

პირველი გამოფენა ‘რობოტების მარში’ 2014 წელს ჩატარდა მოსკოვში. ორგანიზატორებმა გადაწყვიტეს, რომ სტარტი საკმაოდ წარმატებული გამოდგა, ამიტომ მსვლელობა სხვა რუსულ ქალაქებში გააგრძელეს (სანქტ-პეტერბურგი, სოჭი, კრასნოდარი, ეკატერინბურგი) და საბოლოოდ ერევანში ჩამოვიდნენ, სადაც 10 დღით დარჩებიან. ორგანიზატორებს მიაჩნიათ, რომ ‘რობოტების მსვლელობა’, უბრალო გასართობი კი არა, ბავშვებისთვის სასარგებლო აქტივობაა. ერევნელი მშობლები, რომლებიც თავადაც ხალისობენ რობოტებით, სავსებით ეთანხმებიან ამ მოსაზრებას.