თბილისში ФСБ-სთან დაკავშირებული ორგანიზაციის კონფერენცია გაიმართა. სამი დღით ადრე ისინი ცხინვალში იმყოფებოდნენ

ФСБ-სთან დაკავშირებული ორგანიზაცია

22 აპრილს თბილისში იმართება კონფერენცია: “რუსეთი და მსოფლიო: დიალოგები – 2024, მიზიდულობის ძალები”. კონფერენციის ერთ-ერთი ორგანიზატორი რუსეთის კომუნიკაციების კვლევის ეროვნული კვლევითი ინსტიტუტია (НИИКР) – ინსტიტუტის დამფუძნებლები რუსეთის ფედერალური უსაფრთხოების სამსახურის (ФСБ), საგარეო დაზვერვის (СВР) და КГБ-ს ვეტერანები არიან.

მედიაში გავრცელებული ინფორმაციით, ორგანიზაციამ მსგავსი ღონისძიება სამი დღის წინ ცხინვალშიც გამართა. შესაბამისად, დარღვეულია ოკუპაციის შესახებ კანონი. ამას ადასტურებს როგორც ოკუპირებულ ცხინვალში გამართული კონფერენცია, ასევე თბილისში ჩამოსულ სტუმრების შესახებ გავრცელებული ინფორმაცია.

თბილისში მიმდინარე კონფერენციის სტუმრების სიაშია რუსეთის მოქალაქე ვალენტინა კომლევა, რომელიც თბილისში ჩამოსვლამდე ცხინვალში იმყოფებოდა.

НИИКР-ს ვებგვერდზე გამოქვეყნებული ანონსის მიხედვით, კონფერენციაზე რუსმა და ქართველმა ექსპერტებმა უნდა განიხილონ თემა “ტრადიციულ ღირებულებებზე, როგორც ქვეყნებისა და ერების დამაახლოებელზე”.

საქართველოდან კონფერენციაში ჩართული არიან პრორუსული ორგანიზაციები, “ევრაზიის ინსტიტუტი” და სამეცნიერო-კვლევითი ცენტრი SIKHA Foundation-ი, რომლის დამფუძნებელი არჩილ სიხარულიძეა. ის აქტიურად ეწინააღმდეგება საქართველოს ევრო-ატლანტიკურ ინტეგრაციას და რუსეთის პროპაგანდისტული არხების ხშირი სტუმარია. 

“ევრაზიის ინსტიტუტის” დამფუძნებელი, გულბაათ რცხილაძე “მთავარ არხთან” საუბრისას აღნიშნულ კონფერენციას აფასებს როგორც “ქართულ-რუსულ ერთობას, ერთსულოვნებას და სიყვარულს.”

აღსანიშნავია, რომ გულბაათ რცხილაძე უკრაინაში მებრძოლ რუს ოკუპანტებს დახმარებას უგზავნიდა, ის ასევე აქტიურად მხარს უჭერს რუსეთთან საქართველოს ეკონომიკურ თანამშრომლობას და ჩართულია საქართველოში კრემლის დეზინფორმაციის გავრცელების კამპანიაში.

Агентство-ს ცნობით, გასულ წლებში ამ კონფერენციებში მონაწილეობდნენ კრემლისა და რუსეთის საგარეო საქმეთა სამინისტროს წარმომადგენლები. 

ორგანიზატორები ამ ფორმატში სულ 5 კონფერენციის ჩატარებას გეგმავენ, თბილისის გარდა, ოკუპირებულ ცხინვალში, დუშანბესა და მინსკში, მთავარი სესია კი 23 მაისს მოსკოვში გაიმართება. 

● “ჰავანას სინდრომის” და გრუ-ს აგენტების კვალი თბილისში. The Insider-ის, Spiegel-ის და CBS-ი გამოძიება
● “Крым наш”: ხუთი მთავარი მითი ყირიმის შესახებ, რომლებსაც კრემლი ავრცელებს
● სტალინი და საქართველო. რთული ურთიერთობების ისტორია

რა არის НИИКР-ის კვლევითი ინსტიტუტი და ვინ არიან მისი დამფუძნებლები

НИИКР შეიქმნა 2020 წელს. მის თანადამფუძნებელთა შორის იყო ნიკოლაი გრიბინი – КГБ-ს ყოფილი აგენტი კოპენჰაგენში, КГБ-ს მე-3 განყოფილების (რომელსაც ებარა დიდი ბრიტანეთი, ავსტრალია და სკანდინავიის ქვეყნები) ყოფილი მეთაური და საგარეო დაზვერვის აკადემიის ყოფილი ხელმძღვანელი. ამის შესახებ საუბარია თავად ინსტიტუტის ვებგვერდზე და რუსული სპეცსამსახურების ისტორიის საიტზე.

მეორე თანადამფუძნებელია ირინა ზავესნიცკაია, რომელიც დარეგისტრირებულია იგივე მისამართზე, რომელსაც იყენებს НИИКР-ს დირექტორი, ვლადისლავ გასუმიანოვი. გასუმიანოვის ოფიციალური ბიოგრაფიის მიხედვით, იგი მუშაობდა КГБ-ში, СВР-სა და ФСБ-ში 1982-2001 წლებში. გასუმიანოვი ასევე მუშაობდა რუსეთის პრეზიდენტის უცხოეთის ქვეყნებთან რეგიონთაშორისი და კულტურული კავშირების საკითხების მართვის ხელმძღვანელის მოადგილედ.

НИИКР-ს სამეთვალყურეო საბჭოში, გასუმიანოვისა და გრიბინას გარდა, შედიან საბჭოთა და რუსული სპეცსამსახურების სხვა ყოფილი თანამშრომლებიც:

ანატოლი ბოლიუხი, КГБ-ს გენერალ-ლეიტენანტი – КГБ-ს მეხუთე განყოფილების ყოფილი ხელმძღვანელი. 2014 წელს, მაიდნის მოვლენების დროს, სერგეი ბესედასთან ერთად იმყოფებოდა კიევში. რუსეთის უკრაინაში შეჭრის შემდეგ, გავრცელდა ინფორმაცია მისი და ბესედას დაპატიმრების შესახებ.

ბორის მიროშნიკოვი, ФСБ-ს გენერალ-ლეიტენანტი – ФСБ-ს კონტრდაზვერვითი ოპერაციების განყოფილების უფროსის ყოფილი მოადგილე.

ვალენტინ სობოლევი, ФСБ-ს გენერალ-პოლკოვნიკი – ФСБ-ს კონტრდაზვერვის უფროსის ყოფილი მოადგილე და რუსეთის ფედერაციის უშიშიროების საბჭოს ყოფილი მდივანი.