პუტინმა სამხრეთ ოსეთში ახალ ელჩად ქართულ- ოსური კონფლიქტის ზონაში სამშვიდობო ძალების ყოფილი ხელმძღვანელი დანიშნა

რუსეთის პრეზიდენტმა ვლადიმერ პუტინმა  სამხრეთ ოსეთში რუსეთის ფედერაციის  ახალი  საგანგებო და სრულუფლებიანი ელჩი  დანიშნა. მარატ კულახმეტოვი ქართულ- ოსური კონფლიქტის ზონაში სამშვიდობო ძალების  ყოფილი ხელმძღვანელია.

შესაბამისი ბრძანება სამართლებრივი ინფორმაციის ოფიციალურ ინტერნეტ-პორტალზე გამოქვეყნდა.

ყოფილი ელჩი,  ელბრუს კარგიევი  რუსეთის  პირველი ელჩი იყო სამხრეთ ოსეთში. ის ცხინვალში რუსულ დიპლომატიურ მისიას  2008 წლის ბოლომდე ხელმძღვანელობდა.  მის დროს  აშენდა და  ამოქმედდა საელჩოს კომპლექსი  ცხინვალში

მარატ კულახმეტოვი  შერეულ  სამშვიდობო ძალებს  ქართულ-ოსური კონფლიქტის ზონაში 2004-2008 წლებში ხელმძღვანელობდა. 2011 წლიდან კი  რუსეთის საგარეო საქმეთა მინისტრის მრჩევლის თანამდებობაზე მუშაობდა.

ოფიციალური თბილისის რეაქცია

„ჩვენთვის აბსოლუტურად მიუღებელია ნებისმიერი ე.წ. დანიშვნა, რომელიც რუსეთის ე.წ. აღიარების ფარგლებში საქართველოს ტერიტორიულ მთლიანობას და სუვერენიტეტს კიდევ ერთხელ არღვევს. ამიტომ, რა თქმა უნდა, ამას არანაირი ლეგიტიმური და სამართლებრივი განზომილება არ გააჩნია ჩვენთვის. თან საუბარია პირზე, რომელიც უშუალოდ ჩართული იყო 2008 წლის მოვლენებში. მე უბრალოდ სხვა კომენტარს ვერ გავაკეთებ. ეს ჯდება იმ პოლიტიკის ხაზში, რასაც რუსეთის ფედერაცია დღემდე ახორციელებს საქართველოს ტერიტორიაზე“, – განაცხადა ქეთევან ციხელაშვილმა.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არ ემთხვეოდეს.