სომხეთის პარლამენტმა პრემიერ-მინისტრის თანამდებობაზე ნიკოლ პაშინიანის წინააღმდეგ მისცა ხმა
სომხეთის ეროვნულმა საკრებულომ პრემიერ-მინისტრის თანამდებობაზე ოპოზიციონერი ნიკოლ პაშინიანის კანდიდატურის წინააღმდეგ მისცა ხმა. საერთო-სახალხო მოძრაობის ლიდერმა დეპუტატების უმრავლესობის ხმები ვერ მიიღო, რათა სახელმწიფოს მეთაური გამხდარიყო.
ოთხიდან სამმა საპარლამენტო ძალამ ნიკოლ პაშინიანის კანდიდატურას მისცა ხმა. მაგრამ მათი ხმები საკმარისი არ აღმოჩნდა. მმართველმა უმრავლესობამ ხმა მის წინააღმდეგ მისცა, და საბოლოოდ მის სასარგებლოდ 45 ხმა დაგროვდა, წინააღმდეგ კი – 56.
კონსტიტუციის თანახმად, შვიდი დღის შემდეგ პარლამენტში უნდა ჩატარდეს კიდევ ერთი სხდომა, რომელზეც ისევ გაგრძელდება საკითხის გადაწყვეტა, თუ ვინ გახდება სომხეთის პრემიერ-მინისტრი. საპარლამენტო ფრაქციებს საშუალება ექნებათ, რომ პრემიერ-მინისტრობის თავიანთი კანდიდატები წამოაყენონ. თუკი მეორე ეტაპზე პრემიერს ვერ აირჩევენ, ეროვნულ საკრებულოს დაითხოვენ და რიგგარეშე საპარლამენტო არჩევნები ჩატარდება.
ჯერჯერობით უცნობია, წამოაყენებენ თუ არა ფრაქციები თავიანთ კანდიდატებს, თუ ამ თანამდებობაზე ერთადერთ პრეტენდენტად ნიკოლ პაშინინი დარჩება.
კენჭისყრის შემდეგ ნიკოლ პაშინიანი გაემართა რესპუბლიკის მოედნისკენ, სადაც მას ათასობით მომხრე ელოდა. ისინი იქიდან, ერევნის მთავარი მოედნიდან ადევნებდნენ თვალს პარლამმენტში მიმდინარე მრავალსაათიან მსჯელობას. ოპოზიციური მოძრაობის ლიდერმა ხალხს მოუწოდა, რომ ხვალიდან, 2 მაისის დილიდან დაუმორჩილეობლობის მოძრაობა გაგრძელდეს.
შეგახსენებთ, რომ ეს მოძრაობა 13 აპრილს დაიწყო სერჟ სარგსიანის მიერ ქვეყნის მართვის საწინააღმდეგოდ, რომელიც უკვე 10 წელიწადის განმავლობაში იყო ქვეყნის პრეზიდენტი. შემდეგ საპროტესტო აქციები გადაიზარდა მძლავრ მრავალათასიან მოძრაობაში, რომელიც სომხეთშირესპუბლიკური პარტიის მმართველობის წინააღმდეგ იბრძვის. ამ პარტიის ლიდერია სერჟ სარგსიანი. აპრილიდან სომხეთის სრულად გადავიდა საპარლამენტო მმართველობაზე. პარლამენტის უმრავლესობას კი რესპუბლიკური პარტიის დეპუტატები შეადგენენ.
რატომ მისცა წინააღმდეგ ხმა საპარლამენტო უმრავლესობამ
საპარლამენტო განხილვების დროს მმართველი პარტიის დეპუტატები ირწმუნებოდნენ, რომ საშინაო და საგარეო პოლიტიკისადმი ნიკოლ პაშინიანის მიდგომები მოქმედი ხელისუფლების პოლიტიკისგან არსობრივად არ განსხვავდება. მეტიც, რესპუბლიკელმა დეპუტატებმა მიიჩნიეს, რომ ნიკოლ პაშინიანის არჩევის შემთხვევაში, შესაძლოა, ქვეყანაში კრიზისი გაღრმავდეს.
„რომელ ღილაკსაც უნდა დავაჭიროთ თითი – თანახმა ვიქნებით, თუ წინააღმდეგ წავალთ, პასუხისმგებლობა მაინც ჩვენ დაგვეკისრება. ეს საშიშია“, – განაცხადა დეპუტატმა კარენ ბაკარიანმა.
სომხეთის რესპუბლიკური პარტიის ბევრმა წარმომადგენელმა განაცხადა, რომ ნიკოლ პაშინიანი პრემიერ-მინისტრი ვერ იქნება, რადგან მას საკმარისი გამოცდილება არ გააჩნია. მათი აზრით, მან თავი კარგად გამოავლინა მოედნებზე, ხალხის წინაშე გამოსვლებისას, საპარლამენტო დებატებში, საინფორმაციო სივრცეში, მაგრამ გეოპოლიტიკის სფეროში ის ჯერ კიდევ არ არის ძლიერი.
„თქვენ თქვით, „სერჟ სარგსიანი უარვყოთ“ – და ის წავიდა. უარყავით კარენ კარაპეტიანი [2016 წლიდან 2018 წლამდე სომხეთის პრემიერ-მინისტრი, დ ახლა, სერჟ სარგსიანის გადადგომის შემდეგ პრემიერის მოვალეობის დროებით შემსრულებელი JAMnews ]– და ის წავიდა. ჩვენი კანდიდატი არ წამოვაყენეთ, მაგრამ ქვეყანას ოპოზიცია სჭირდება, პლურალიზმი, თავისუფლების განხორციელების შესაძლებლობა. დემოკრატია ტოტალიტარული გამოვლინებებით არ მყარდება. არ მინდა, რომ პაშინიანი, რომელიც სომეხი მანდელა გახდა, უცბად სომხეთის უკანასკნელ პრემიერად იქცეს“, – აღნიშნა სომხეთის რესპუბლიკური პარტიის დეპუტატმა არმენ აშოტიანმა.
