სახლები ნაგავსაყრელზე
ასეთი სანახაობა ცხინვალში არცთუ ცოტაა – უპატრონო, ბალახითა და ნაგვით დაფარული ტრიალი მინდვრები და ნახევრად დანგრეული, პატრონებისგან მიტოვებული სახლები.
2010 წელს ქალაქის ხელისუფლებამ ძალიან კარგ გამოსავალს მიაგნო, რამაც ერთდროულად ორი პრობლემა გადაჭრა – ერთი ის, რომ ქალაქის იერსახე გაუმჯობესდა, და მეორეც – ახალი საცხოვრებელი სახლები გაჩნდა. ასევე უნდა აღინიშნოს, რომ ხელისუფლების გეგმა საბიუჯეტო სახსრების ხარჯვის გარეშე განხორციელდა.
ქალაქის მესვეურებმა ორი პრობლემა ერთმანეთს შეუთავსეს – მიტოვებული მიწის ნაკვეთები საცხოვრებლის პრობლემების მქონე ოჯახებს გადასცეს, იმ პირობით, რომ ბენეფიციარები ამ ნაკვეთებზე სამი წლის განმავლობაში სახლებს აიშენებდნენ. მთლიანობაში ქალაქის ადმინისტრაციის მიერ ინიცირებულ პროექტში 50-ზე მეტი ოჯახი ჩაერთო.
უკვე თითქმის ხუთი წელია გასული, გავერანებული ნაკვეთები კი კიდევ უფრო ცუდად გამოიყურება. “ქალაქის ხელისუფლებას, რა თქმა უნდა, ესმის, რომ სახლის აშენება არც ისე ადვილია. ეს პროცესი დროსთან და ფინანსურ რესურსებთანაა დაკავშირებული,”-აცხადებს ცხინვალის მერიის პრესმდივანი, ძერასა კოზაევა.
თუმცა, მოსახლეების დიდ ნაწილს სამშენებლო ნარჩენები და ნაგავიც კი არ გაუტანია თავისი ნაკვეთებიდან. “ვუგზავნიდით თხოვნას, გაფრთხილებასა და შეტყობინებებს – ძალიან ჰუმანურად მივუდექით ამ საკითხს. იმ შვიდ ოჯახს, რომლებსაც სასამართლო ელოდა, სიტუაციის გამოსასწორებლად დამატებითი ორი თვეც მივეცით,” – ამბობს ძერასა კოზაევა.
შედეგად, 2015 წლის სექტემბერში ქალაქის ადმინისტრაციამ შვიდივე ხელშეკრულება სასამართლოს გადასცა. ქალაქის მესვეურები გაცემული მიწის ნაკვეთების უკან დაბრუნებას ითხოვენ. გადაწყვიტეს, ამ პროექტის ამოქმედება კიდევ ერთხელ სცადონ. პროექტის მონაწილე ოჯახების ახალი სიაც შეადგინეს. მათ ქალაქის პრესტიჟულ რაიონებში გადაეცემათ ნაკვეთები, რომლებზეც ისინი სახლებს აიშენებენ და ამით ქალაქის იერსახესაც გააუმჯობესებენ.
ამ მომენტისათვის ერთ-ერთ საქმეზე უკვე მიღებულია გადაწყვეტილება – სასამართლომ ნაკვეთი ქალაქს დაუბრუნა. დანარჩენ საქმეებზე გადაწყვეტილებას წლის ბოლომდე მიიღებენ.
