ევროკავშირი და სომხეთი ერთმანეთს კიდევ უფრო დაუახლოვდნენ
დღეს საინფორმაციო ცენტრ Erasmus+Youth-ის გახსნისადმი მიძღვნილ პრესკონფერენციაზე სომხეთში ევროკავშირის დელეგაციის ხელმძღვანელმა პიოტრ სვიტალსკიმ განაცხადა, რომ მოცემულ მომენტში არაფერი უშლის ხელს ევროკავშირსა და სომხეთს შორის ყოველმხრივი და გაფართოებული თანამშრომლობის შეთანხმებას.
„პასუხისმგებელი პირები გაძლიერებულად მუშაობენ იმისთვის, რომ ევროკავშირსა და სომხეთს შორის ახალი შეთანხმების ხელმოწერა ნოემბერში, აღმოსავლეთ პარტნიორობის სამიტის მიმდინარეობისას მართლაც სინამდვილედ იქცეს“, – თქვა მან.
ზოგიერთი სომეხი ექსპერტი და პოლიტიკოსი ეჭვობს, რომ შეთანხმებას ხელი მოეწერება. ისინი იხსენებენ, რომ 2013 წელს სომხეთი ევროკავშირთან ასოციაციის და ყოველმხრივი და თავისუფალი ვაჭრობის ზონის შექმნის შესახებ ხელშეკრულების ხელმოწერას აპირებდა. თუმცა, 3 სექტემბერს სომხეთის პრეზიდენტმა სერჟ საგსიანმა მოულოდნელად განაცხადა, რომ სომხეთი ევროკავშირთან ასოცირებაზე უარს ამბობს და საბაჟო კავშირში წევრიანდება. ბევრს მიაჩნია, რომ ეს რუსეთის მხრიდან ზეწოლის შედეგი იყო.
პიოტრ სვიტალსკიმ განაცხადა, რომ თავად ახლახან დაბრუნდა ბრიუსელიდან, სადაც შეთანხმების ხელმოსაწერად გამზადებაზე პასუხისმგებელ ადამიანებს ესაუბრა. ელჩის თქმით, მათ ის დაარწმუნეს, რომ ყველაფერი გეგმის მიხედვით მიდის.
ადრე სომხეთის პრეზიდენტმა სერჟ სარგსიანმა ახალგაზრდულ შეკრება „ბაზეს“ მონაწილეებთან შეხვედრისას ბანაკის წევრების კითხვას უპასუხა, რომ სომხეთი შემოდგომაზე ყოველმხრივი და გაფართოებული თანამშრომლობის შესახებ შეთანხმების ხელმოწერას აპირებს.
„თუ არ ვცდები, ჩვენ მარტში განვაცხადეთ, რომ დოკუმენტი მთლიანობაში შეთანხმებულია, და ამის შემდეგ მისი პარაფირება მოვახდინეთ. არ არსებობს არანაირი საფუძველი, რომ ამ შეთანხმებას ხელი არ მოვაწეროთ“, – აღნიშნა სერჟ სარგსიანმა.
სომხეთში ლიტვის ელჩმა ერიკას პეტრიკასმა ასევე გამოთქვა აზრი ამ საკითხთან დაკავშირებით, და აღნიშნა, რომ შეთანხმების ხელმოწერის შემდეგ სომხეთისთვის ახალი შესაძლებლობები გაიხსნება.
შეკითხვაზე, ხომ არ არის წინააღმდეგობა იმაში, რომ სომხეთი ევრაზიის ეკონომიკური კვშირის წევრია, ელჩმა უპასუხა: ამაში წინააღმდეგობა არ არის, პირიქით, ეს თანამშრომლობისთვის სასარგებლოა. როდესაც ჩვენ ევროკავშირის 500-მილიონიან ბაზარზე ვლაპარაკობთ, ეს უკვე იმაზე მეტყველებს, თუ რა შესაძლებლობები ექნება სომხეთს. ევროკავშირს, ისევე როგორც სომხეთს, ასევე გაუჩნდება, მაგალითად, ირანთან კავშირის შესაძლებლობა, რომელიც თქვენთან კარგ ურთიერთობაშია. ასე რომ, ჩვენი აზრით, ამით ორივე მხარე მოიგებს“.
