აფგან მუხთარლის საქმის გამო, თანამდებობიდან გათავისუფლდნენ სასაზღვრო პოლიციისა და კონტრდაზვერვის უფროსები

საქართველოს შინაგან საქმეთა მინისტრმა დღეს ვრცელი ბრიფინგი გამართა, სადაც აზერბაიჯანელი ჟურნალისტის, აფგან მუხთარლის საქმეზე შუალედური ანგარიში წარმოადგინა.

მინისტრის თქმით, აფგან მუხთარლის საქმის გამო, თანამდებობიდან გათავისუფლდნენ  საქართველოს სასაზღვრო პოლიციის უფროსი და კონტრდაზვერვის დეპარტამენტის დირექტორი.

“ჩვენ, როგორც უწყების ხელმძღვანელები, დარწმუნებული ვართ ჩვენი თანამშრომლების უდანაშაულობაში, მაგრამ გამოძიებას არ აქვს უფლება, გამორიცხოს რომელიმე ვერსია და ვინაიდან, ნებისმიერ შემთხვევაში მოხდა საზღვრის კვეთა გაურკვეველ ვითარებაში, მიღებულია შესაბამისი გადაწყვეტილება,” – განაცხადა მღებრიშვილმა.

მისი თქმით, აღნიშნულ საქმესთან დაკავშირებით ჩატარდა არაერთი საგამოძიებო მოქმედება – ამოღებული და დათვალიერებულია 46 კამერის ვიდეოჩანაწერი.  დაკითხულია 343 მოწმე. (სამარშრუტო მიკროავტობუსების მძღოლები, ავტოსადგომის მუშაკები, ტაქსის მძღოლები, გარემოვაჭრეები და კერძო ობიექტების დაცვის თანამშრომლები და სხვები). მხოლოდ ნიაღვრისა და ჭონქაძის ქუჩებზე, (საიდანაც, სავარაუდოდ, მოხდა მუხთარლის გატაცება _JAMnews) გამოიკითხა 127 მოწმე.

მღებრიშვილი ამბობს, რომ ერთადერთი ვიდეოკამერა, რომელმაც აფგან მუხტარლი დააფიქსირა ნიკოლოზ ბარათაშვილის ქუჩაზე ნომერ 2-ში მდებარე სახელმწიფო ელექტროსისტემების ობიექტზეა დამონტაჟებული. ვიდეოჩანაწერში ჩანს თეთრმაისურიანი ადამიანი, სავარაუდოდ, აფგან მუხთარლი, რომელიც ნომერ 4 სამარშრუტო მიკროავტობუსში ჯდება.

მას შემდეგ მუხთარლი არც ერთ სხვა კამერას არ დაუფიქსირებია. მის შესახებ არაფერი იციან გამოძიების მიერ დაკითხულმა მოწმეებმაც. არავის დაუნახავს 29 მაისს ვინმეს მიმართ ფიზიკური შეურაცხყოფის ან ავტომანქანით გატაცების ფაქტი.

მისივე თქმით, ასევე გამოიკითხა შინაგან საქმეთა სამინისტროს სასაზღვრო პოლიციის დეპარტამენტის 61 თანამშრომელი, რომლებმაც განმარტეს, რომ  29 მაისს ლაგოდეხის სასაზღვრო გამშვებ პუნქტში, დედოფლის წყაროსა და სიღნაღის რაიონებში არსებულ სასაზღვრო ზოლში რაიმე სახის ინცინდენტს ან საეჭვო გარემოებას ადგილი არ ჰქონია.

გამოძიებამ “მაგთიკომიდან” აფგან მუხტარლის მობილურის ნომერზე  შემავალი და გამავალი ზარების დეტალური ნუსხაც გამოითხოვა, თუმცა რაიმე კონკრეტულ კვალს გამოძიებამ ვერც აქ მიაგნო.

მღებრიშვილის თქმით, საქართველომ აზერბაიჯანის შესაბამის ორგანოებსაც მიმართა  შუამდგომლობით, რომ მათ ხელთ არსებული სისხლის სამართლის საქმის მასალები ქართულ მხარესაც გაუზიარონ. ასევე, ქართული მხარე ითხოვს, აფგან მუხთარლის დეტალურ დაკითხვას და ამ დაკითხვაზე ქართული მხარის დასწრებას.