Ermənistanda sutka ərzində yüzlərlə məhbus azadlığa buraxılıb

Ermənistanda amnistiya haqda qanun layihəsi qüvvəyə minəndən sonra cəmi bir sutka ərzində yüzlərlə məhbus azadlığa çıxıb.

Yüzlərlə insan azadlığına qovuşub

7 noyabr saat 13:00-a olan məlumata əsasən, cəzaçəkmə müəssisələrindən 330 məhbus azadlığa buraxılıb. Onların arasında 13 nəfər əcnəbi vətəndaş var.

Böyük amnistiya Yerevanın 2800 illiyinə və Birinci müstəqil respublikanın 100 illiyinə həsr olunub.

• Məhbəsdən məktublar: gələcək gözəldir, əgər mövcuddursa

• Ermənistanda hüquq müdafiə hərəkatının tarixi

Amnistiya kimlərə aid edilib?

Amnistiya cəza müddəti 3 ili aşmayan məhbuslara aid edilib. Cəza müddəti 6 ildən çox olmayan birinci və ikinci qrup əlil məhbuslara da amnistiya tətbiq olunub.

60 yaşdan yuxarı və 18 yaşına qədər cinayət törədən və buna qədər məhkumluğu olmayan məhbuslar da azadlığa buraxılıb.

Ədliyyə naziri səlahiyyətlərini yerinə yetirən Artak Zeynalyanın sözlərinə görə, 6500-ə qədər məhbus amnistiyadan yararlanacaq. Bununla belə azadlığa çıxanların sayı 650 nəfər olacaq, qalanlarının isə cəza müddəti azalacaq.

Amnistiya niyə elan olunub?

Qanun layihəsinin təşəbbüskarları bəyan edirlər ki, amnistiya “humanist niyyətlə” elan olunub. Həmçinin hökumət cəzaçəkmə müəssisələrini bir qədər boşaltmaq məqsədi güdüb.

Milli Məclisdə amnistiya haqda qanun layihəsi müzakirə edilərkən bəzi deputatlar tələb edib ki, amnistiya “Sasna tsrer” silahlı qruplaşmasının üzvlərinə də aid olunsun. 2016-cı ildə onlar Yerevanda polisin post-patrul xidməti alayını ələ keçirib, iki həftə saxlamışdı. O zaman polislər qətlə yetirilmişdi.

Nəticədə belə qərara alınıb ki, yalnız həlak olanların doğmaları etiraz etməzsə, qruplaşma üzvləri azadlığa buraxılsın.

Xüsusi hal

Amnistiyaya düşənlərin arasında Ermənistanda tanınmış siyasi xadim Şant Harutunyan da var. Çoxları onu siyasi məhbus hesab edir. O, artıq azadlığa çıxıb.

Şant Harutunyan “Tsexakron” partiyasının rəhbəridir. 2013-cü il noyabrın 5-də o, silahdaşları ilə birlikdə “Anonimus marşı”na başlayıb və nəticədə polislə qarşıdurmalar baş verib. Yoldaşları ilə birlikdə o həbs olunub və 6 il müddətinə azadlıqdan məhrum edilib. Şant Harutunyan özünün ifadə etdiyi kimi “dəyərlər inqilabı” etməyə çalışıb.

Bu ilin yazında məxməri inqilab nəticəsində hakimiyyətə gələn ölkənin yeni hökuməti dəfələrlə ona azadlıq təklif edib. Hökumətin mətbuat xidmətindən verilən məlumata görə, bunun üçün Harutunyan sadəcə “saxlanma rejiminin dəyişdirilməsi ilə bağlı lazım olan sənədləri” imzalamalı idi. Məsələn, söhbət əfv ərizəsini imzalamaqdan gedir. Amma Şant Harutunyan bundan imtina edib. Onun oğlu Şaqen Harutunyan bunun nə ilı bağlı olduğuna aydınlıq gətirib:

“Şant Harutunyan təqsirini boynuna almalı olacağı istənilən sənədi imzalamaq istəməyib, əfv ərizəsi yazmaq istəmirdi, çünki siyasi məhbusdur. O, beynəlxalq hüquq müdafiə təşkilatları tərəfindən siyasi məhbus kimi tanınıb… Bu variantda isə [amnistiyanı nəzərdə tutur – JAMnews] o, mahiyyət etibarilə heç bir sənədi imzalamır, onun razılığı mütləq deyil, o öz günahını qəbul etmiş olmur, o sadəcə heç bir imzasız azadlığa çıxır”.