Gürcüstan əhalisinin əksəriyyəti heç bir partiyanı dəstəkləmir – NDI

Gürcüstanda siyasi partiyaların dəstəyi aşağı səviyyədə qalmaqda davam edir. Əhalinin ölkənin inkişafı ilə bağlı fikirləri müxtəlifdir. Əhalinin yarısı düşür ki, hakimiyyət doğru yolla gedir, digər yarısı isə tam əks fikirdədir.

Milli Demokratiya İnstitutu və Resursların Tədqiqat Mərkəzinin apardığı tədqiqatın nəticələri belədir. Sənədin siyasi hissəsi bu gün, mayın 15-də açıqlanıb.

Əhalinin 42 faizi iddia edir ki, heç bir partiya onların görüşlərinə uyğun deyil. Hakim “Gürcü arzusu” partiyasını keçən illə müqayisədə daha az adam dəstəkləyir – seçicilərin 29 faizi, halbuki 2016-cı ilin noyabrında onlar 40 faiz idi. 10 faizlik dəstək müxalif “Vahid Milli Hərəkat”ın, 4 faiz “Vətəndaş alyansı”nın, 3 faiz isə Leyborist partiyanındır. Qalan partiyalar tədqiqatın şərti 3 faizlik baryerini aşa bilməyib.

Əhalinin ölkənin inkişafına münasibətinin ikili olmasına baxmayaraq, əksəriyyət (72 faiz) Gürcüstanın 15 il əvvəlki dövrlə müqayisədə yaşamaq üçün daha rahat ölkə olduğunu düşünür. Əhalinin 69 faizi ölkənin gələcəyi ilə bağlı nikbin fikirdədir, halbuki burda da əhalinin fikirləri fərqlənir. 50 faiz indiki hakimiyyətin mühüm dəyişiklikləri həyata keçirdiyini düşünür, 48 faiz isə əks fikirdədir.

Sorğuda iştirak edənlərin əksəriyyəti nazirliklərin və siyasi liderlərin fəaliyyətini kafi qiymətləndirir. Respondentlərin xeyli daha az hissəsi onların fəaliyyətinə müsbət qiymət verir. Sorğuda iştirak edənlərə prezidentin (27 faiz) və baş nazirin (25 faiz) fəaliyyəti daha pozitiv görünür.

Ən çox müsbət qiymət səhiyyə, ədliyyə, müdafiə nazirlikləri, ən çox mənfi qiymət isə kənd təsərrüfatı, iqtisadiyyat və maliyyə nazirlikləri alıb. Müsbət rəy alan başqa institutlardan kilsə, ədliyyə evləri və Gürcüstan ordusudur. Ən kritik olanlar Tbilisi sakrebulosu və Gürcüstan parlamentidir.

“Alınan məlumatlardan görünür ki, əhali hakimiyyətə və siyasi partiyalara laqeyd yanaşır. Seçicilərin əksəriyyəti hələ də heç bir siyasi partiyaya güvənmir”, – Milli Demokratiya İnstitutunun Gürcüstan ofisinin rəhbəri Lora Tornton bildirib. – Qeyd etmək lazımdır ki, əhali fəaliyyəti ilə gündəlik həyatında qarşılaşdığı nazirliklərə daha tənqidi köklənib, bunlar iqtisadiyyat, maliyyə və kənd təsərrüfatı nazirlikləridir.

Əhalinin əksəriyyəti birbaşa prezident seçkisinin tərəfdarıdır

Tədqiqatda konstitusiya islahatları haqqında iki sual var idi. Konstitusiya layihəsinə əsasən, prezident birbaşa seçki yolu seçilməyəcək, majoritar seçki sistemi ləğv olunacaq. Bu dəyişikliklər sorğuda iştirak edənlərin çoxunun ürəyincə deyil.

Əhalinin 84 faizi hesab edir ki, prezidenti ölkənin bütün vətəndaşları seçməlidir. Hakim “Gürcü arzusu” partiyasının tərəfdarlarının əksəriyyəti də bu qənaətdədir. Bundan əlavə, əhalinin demək olar ki, yarısı parlament seçkilərində majoritar sistemin saxlanılmasının tərəfdarıdır. Və sorğuda iştirak edənlərin yalnız 28 faizi majoritar seçkilərin ləğvi fikrini dəstəkləyir.