“Xankəndidəki qanunsuz rejim məhvə məhkumdur”. Bakıdan şərhlər
Əliyevin çıxışına şərhlər
Azərbaycan prezidenti İlham Əliyevin ultimatum tonunda tanınmamış DQR hakimiyyətinin təslim olmasını tələb etdiyi çıxışından sonra Qarabağın Rusiya sülhməramlılarının yerləşdiyi hissəsi ətrafında hadisələr sürətlə inkişaf edir. Tanınmamış respublikanın hakimiyyət orqanları yardım xahişi ilə beynəlxalq ictimaiyyətə üz tutub, Qarabağda Azərbaycan ordusu ilə Ermənistan silahlı qüvvələri arasında atışmalar başlayıb. Əliyevin çıxışını şərh edən siyasi icmalçı Hacı Namazov “Xankəndidəki qanunsuz rejim məhvə məhkumdur” deyir.
- “Paşinyan Kişinyov görüşünə ümid edir”. Bakıdan şərh
- Moskvada Əliyev-Paşinyan dialoqu: sənədlərin imzalanması baş tutmayıb
- Azərbaycanda ölmüş şəxsin ipoteka kreditini vərəsələri ödəməli olacaq?
Qarabağda vəziyyətin gərginləşməsi nəyə gətirib çıxaracaq və rəsmi Bakı ilə Xankəndidəki tanınmamış rejim arasında münaqişə necə həll oluna bilər?
Azərbaycanlı siyasi icmalçılar mövcud vəziyyəti və onun həll yollarını şərh edirlər.
Hacı Namazov, siyasi icmalçı:
“İlham Əliyevin kifayət qədər sərt çıxışında Xankəndidəki qanunsuz və tanınmamış rejimin rəhbərliyinə ultimatum verildiyini aydın görmək olar.
Mən ehtimal edə bilirəm ki, Azərbaycan prezidentinin sözləri bu rejimin lap zirvəsi üçün gözlənilməz olmayıb. Bəlkə də onlar qoyulmuş son tarixi də bilirlər, çünki zərurət yarandıqda Bakı ilə Xankəndi arasında pərdəarxası əlaqə işə düşür.
Əliyevin çıxışından iki gün sonra Qarabağın Rusiya sülhməramlılarının müvəqqəti yerləşdiyi hissəsi ətrafında hadisələr sürətlə inkişaf edir. Artıq qeyri-qanuni silahlı birləşmələrlə Azərbaycan ordusu arasında atışmaların olması barədə məlumatlar yayılıb.
Qüvvələr qətiyyən bərabər deyil, burda deyiləcək bir söz yoxdur. Qarabağ ermənilərinin silah ehtiyatlarını artırmaq yolları bağlıdır. Əliyevin öz çıxışında eyham vurduğu “başqa ssenari” olarsa, Xankəndidəki qanunsuz rejim məhvə məhkumdur.
Amma bütün bunlarla yanaşı 2020-ci ildən Azərbaycanda ən ağır maddələrlə haqqında cinayət işi açılmış Araik Harutyunyan və onun ətrafı “saman çöpündən yapışmağa” çalışırlar. Bir bəyanatın ardınca digəri səslənir və bu bəyanatlar əsasən adəti üzrə dünyanın müxtəlif yerlərində baş verənləri ancaq “qınaya” bilən dünya ictimaiyyətinə ünvanlanır.
Onu da qeyd edək ki, son illər İlham Əliyev demək olar, dediyi hər şeyi edir. Daha doğrusu, o, yalnız artıq planlaşdırılmış və nəzəri cəhətdən məntiqi sona çatdırılmış şeylər haqda danışır. Bu baxımdan isə mən Qarabağ ermənilərinin yerində olsaydım, optimist planlar qurmazdım. Üstəlik, Yerevanın “Qarabağ problemi”ndən praktiki olaraq imtina etdiyini nəzərə alsaq.
Qarabağın erməni əhalisinin rəhbərləri ətrafında baş verənlərlə bağlı proqnozlarıma gəlincə, əgər nəticə yaxşı olarsa, onlar bütün i-ləri nöqtələmək üçün rəsmi Bakıdan yeni görüş istəyəcəklər. Ən pis ssenarinin necə olacağını isə yəqin ki, hər kəs bilir”.
Fərhad Məmmədov, politoloq:
“Azərbaycan Prezidenti İlham Əliyev Laçında qeyd edib ki, “Qarabağ ermənilərinin rəhbərliyinin taleyinin necə olacağı ilə bağlı mesajlar gəlir?!”
İki vacib məqam:
• bu mesaj kimdən gəlir?! Rusiyadan, yoxsa Qərbdən (ABŞ, Aİ)?
• və mesajlar yalnız rəhbərliyə aiddir, əhaliyə aid deyil!
Yəni vasitəçilərdən ən azı biri Azərbaycanın regionun tam reinteqrasiyası yolundan dönməyəcəyini aydın başa düşür.
Əgər onlar, vasitəçilər bunu soruşurlarsa, deməli, Qarabağ ermənilərinin “liderləri” özləri də bunda maraqlıdırlar.
Prezident İlham Əliyev amnistiyanın mümkünlüyünü açıq şəkildə bildirdi və şərtləri təqdim etdi. İndi “top” bu mesajı Qarabağ ermənilərinin “rəhbərliyi”nə çatdırmalı olan vasitəçilərdədir.
O ki qaldı Qarabağın mülki əhalisinə, deyəsən, heç kimin vecinə deyil. Onlara vətəndaşlıq, Araik və ətrafının hərbi diktaturasının buxovlarından çıxmağı, Rusiya, Fransa, İran və ABŞ-dakı ayrı-ayrı dairələrin geosiyasi maraqları üçün sövdələşmə predmeti olmamağı təklif edən Azərbaycandan başqa. Axı məhz onlar üçün daha ağrılı olacaq!”
