İyulun 4-də yerli vaxtla saat 21:50-də sahildən təxminən 30 kilometr aralıda Xəzər dənizində partlayış baş verib. Bir neçə saat ərzində dövlət strukturları ziddiyyətli bəyanatlarla çıxış ediblər ki, bu da cəmiyyətdə bəzi şayiələrin yaranmasına səbəb olub.
Partlayışdan bir neçə dəqiqə sonra Bakıda sahil kənarında istirahət edənlər sosial şəbəkələrdə hadisənin fotoşəkillərini və videolarını paylaşmağa başlayıblar. istifadəçilərin baş verənlərlər bağlı ilkin versiyası dənizin həmin hissəsində yerləşən “Ümid” platformasında partlayış olub.
Partlayışdan yarım saat sonra SOCAR mətbuat xidməti rəhbərinin müavini İbrahim Əhmədov özünün “Facebook” səhifəsində bildirib ki, dövlət neft şirkətinin heç bir strukturu zərər görməyib və iş adi qaydası üzrə davam edir. O, əlavə edib ki. ilkin məlumata görə, palçıq vulkanının püskürməsi baş verib. Lakin təxminən 3-4 dəqiqədən sonra həmin gümanı öz məlumatından silib.
Bundan sonra dövlət strukturlarından bir-birinə zidd məlumatlar daxil olmağa başlayıb.
Milli elmlər akademiyasından bildirilib ki, həmin ərazidə palçıq vulkanı yoxdur. Ekologiya və təbii sərvətlər nazirliyi isə bu informasiyanı təkzib edib və məlumat yayıb ki, görüntü palçıq vulkanının püskürməsi versiyasına daha çox bənzəyir. Respublika seysmoloji mərkəzi də bu iddianın üzərində dayanıb.
Bu cür ziddiyyətli bəyanatlar sosial şəbəkələrdə “qəsd nəzəriyyəsi”nə uyğun gümanların artmasına gətirib çıxarıb.
Sosial şəbəkə istifadəçilərindən biri yazıb ki, partlayış Rusiyaya məxsus sualtı qayqda baş verib. Təxminən elə həmin dəqiqələrdə türkiyəli bloqerlərdən biri şəbəkədə audioyazı yayımlayıb və iddia edib ki, bu, Rusiyanın Azərbaycanın neft strukturlarına hücumudur və Şuşa bəyannaməsinə cavabdır.
Hər şeyə səhər saatlarında aydınlıq gətirilib. SOCAR növbəti bəyanatla çıxış edib və bildirib ki, “Ümid” platformasından 10-12 kilometr aralıda yerləşən Daşlı adasında palçıq vulkanı püskürüb. Buna sübut olaraq vertolyotdan çəkilmiş video da yerləşdirilib.
