“Toplum TV işi” ilə bağlı istintaq aktivləşib
“ToplumTV işi” – dindirmələr davam edir
“Toplum TV işi”ndə son günlər aktivləşmə görünür. Üç gün ərzində bu işlə bağlı Bakı Şəhər Baş Polis İdarəsində azı 6 nəfər dindirilib.
Bu cinayət işinə əsasən martın əvvəlində 7 nəfər həbs olunandan və iki nəfər polis nəzarətinə götürüləndən sonra üç ay ərzində heç bir əməliyyat tədbiri müşahidə olunmayıb.
- Xankəndidə konsulluq Rusiyanın nəyinə lazımdır? Bakıdan şərh
- “Toplum TV”nin təsisçisi Ələsgər Məmmədli 56 yaşını həbsxanada qeyd edib
- “Keşlə bazarı”nın sökülmə ehtimalı burada dolanan onlarla insanı nigaran qoyub
İyunun 8-də Bakı Şəhər Baş Polis İdarəsində bu işə təqsirləndirilən şəxs qismində cəlb edilən və istintaq müddətində polis nəzarətinə verilən Toplum TV müstəqil internet televiziyasının əməkdaşları Fərid İsmayılov və Elmir Abbasov dindiriliblər. Bu, onların iş üzrə ikinci dindirilməsi olub.
Həmin gün tanınmış jurnalist, gündəlik “Toplumda 10-dan sonra” ictimai-siyasi verilişinin aparıcısı Şahnaz Bəylərqızı şahid qismində ifadə verməyə dəvət olunub.
“Hər şey yaxşı keçdi. Mən vəkilimlə gəlib ifadə verdim. Amma istintaq sirrinin açıqlanmamasına dair iltizam imzalamışam deyə ətraflı məlumat verə bilmərəm.
Onu da deyim ki, Toplum TV-yə qarşı qaldırılan cinayət işi qondarma və uydurmadır. Həbs olunan dostlarımızın tez bir zamanda azadlığa buraxılmasını arzu edirəm”, – deyə o, üç saatlıq sorğu-sualdan sonra polis idarəsini tərk edərkən bildirib.
Bir gün əvvəl Toplum TV-nin iki praktikantı da şahid qismində ifadə verməyə dəvət olunub. Onlar martın 6-da redaksiyaya polis basqını olan gün internet televiziyasının onlarla əməkdaşı arasında saxlanılıb və uzun saatlar davam edən sorğu-sualdan sonra sərbəst buraxılıblar.
İyunun 6-da siyasi şərhçi, “Toplum TV”də “Axşam Söhbətləri” verilişinin aparıcısı, Alya Yaqublu təxəllüsü ilə tanınan Nailə Yaqublu Bakı şəhər Baş Polis İdarəsinə dəvət olunub.
Dörd saatlıq dindirmədən sonra o, təfərrüatları açıqlamadan jurnalistlərə bildirib ki, müstəntiqin sualları bu nəşrin fəaliyyəti ilə bağlı olub.
Onun sözlərinə görə, bu iş üzrə “Toplum TV” və IDI əməkdaşlarının cinayət məsuliyyətinə cəlb edilməsi siyasi xarakter daşıyır, çünki onlar qanunsuz heç nə etməyiblər, əksinə, cəmiyyət üçün çox faydalı işlər görüblər.
“1993-cü ildən ölkə hakimiyyəti konkret məqsəd güdür – müstəqil medianı məhv etmək və ya onları özünətabe etmək. “Toplum TV”nin, “Abzas Media”nın, ümumiyyətlə, müstəqil jurnalistlərin təqib edilməsi də məhz bu məqsədin reallaşdırılmasıdır”.
Bununla belə, Yaqublu əmindir ki, ölkədə fikir azadlığını tamamilə məhv etmək mümkün olmayacaq:
“Biz olmasaq, başqaları gələcək. Fikir azadlığını və demokratiyanı zorakılıq və qadağalarla məhv etmək mümkün deyil”.
“Toplum TV işi”nin istintaqında fəallaşma III Respublika Platformasının spikeri, həmçinin Demokratik Təşəbbüslər İnstitutunun (IDI) rəhbəri Akif Qurbanovun məhkəmədəki son çıxışından sonra başlayıb. O, Apellyasiya Məhkəməsindəki çıxışında Azərbaycan hakimiyyətini sərt tənqid edib və “Toplum TV”yə qarşı cinayət işinin konkret faktlara əsaslanaraq uydurma olduğunu deyib. “Azərbaycan indi Stalin və “NKVD” üsulu ilə idarə olunur”, – deyə o bildirib.
Apellyasiya Məhkəməsi Akif Qurbanovun həbsindən verilən şikayətə baxaraq onu həbsdə saxlayıb.
Bu çıxışdan sonra Akif Qurbanov ailəsi ilə görüşmək və telefon danışıqları aparmaq hüququndan məhrum edilib.
Bakı Apellyasiya Məhkəməsində “Toplum TV” nəşrinin, Demokratik Təşəbbüslər İnstitutunun və III Respublika Platformasının ofislərindəki əmlakın üzərinə həbs qoyulması ilə bağlı şikayətə də baxılıb.
Onların əmlakına mayın 23-də Xətai rayon Məhkəməsinin qərarı ilə həbs qoyulub.
Müraciətdə həbsin əsassız olduğu, ofislərdə bu cinayət işi ilə bağlı olmayan şəxslərin də əşyalarının olduğu bildirilib. Bundan başqa, sözügedən əmlakdan heç bir cinayətdə istifadə olunmadığı qeyd olunub. Bununla belə şikayət rədd edilib.
Əmlaklara qoyulan həbs və ofislərin möhürlənməsi bu vətəndaş cəmiyyəti təşkilatlarının, həmçinin “Toplum TV” internet televiziyasının işini iflic edib.
Martın 6-8-də “Toplum TV”, Demokratik Təşəbbüslər İnstitutu və III Respublika Platformasının 7 nümayəndəsi həbs edilib, daha ikisi polis nəzarəti altında sərbəst buraxılıb. İnternet televiziya redaksiyasının və IDI-nin birlikdə yerləşdiyi ofis möhürlənib.
Onların hamısı Azərbaycan Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) ilə ittiham olunurlar. Bu ittihamla onları beş ildən səkkiz ilədək müddətə azadlıqdan məhrumetmə cəzası gözləyir.
Beynəlxalq təşkilatlar Azərbaycan hakimiyyətini “Tolum TV” “Abzas Media”, “Kanal-13” kimi media orqanlarının həbs olunan əməkdşalarının cinayət təqibinə son qoymağa çağırıb.
