Tbilisi açılıb. Gürcüstan sakinlərinə nəyə icazə verilib, nə hələ də qadğandır?

Koronavirus pandemiyasına görə, aprelin 15-dən qapalı olan Tbilisi mayın 11-də açılıb. Bu o deməkdir ki, indi artıq şəhərdən çıxmaq və şəhərə girmək mümkündür.

Mayın 11-ə olan məlumata görə, Gürcüstanda 638 koronavirusa yoluxma halı təsdiqlənib. 4896 nəfər karantin rejimindədir, 444 nəfər stasionarda nəzarət altında saxlanılır. Koronavirusa yoluxanların 317 nəfəri sağalıb, 10 nəfər isə ölüb.

Bundan başqa, mayın 11-də Gürcüstanda koronavirus epidemiyası səbəbilə tətbiq edilən digər məhdudiyyətlər də aradan qaldırılıb.

Bu gündən nələrə icazə verilib?

• Gürcüstanda bütün növ müəssisələr işə düşüb. Daha əvvəl, mayın 5-də yalnız inşaat şirkətlərinin fəaliyyəti bərpa olunmuşdu.
• Küçədən girişi olan bütün növ pərakəndə və topdansatış mağazaları açılıb. Paltar və ayaqqabı satan mağazalardan başqa. Məsələn, kitab, oyuncaq, kosmetika, idman malları mağazaları artıq açıqdır. Daha əvvəl, mayın 5-də açıq tipli aqrar bazarlar açılmışdı.
• Avtomobil təmiri və avtoyuma xidmətləri yenidən işə başlayıb.
• Məişət texnikası təmiri xidmətləri də açılıb. 
• Bütün növ sənədlərin verildiyi Ədliyyə Evlərinin fəaliyyəti bərpa olunub. Amma qaydalar dəyişib və indi qəbula onlayn rejimdə yazılmaq lazımdır.

Nələr hələ də qadağandır?

• Gürcüstanda hələ də Marneuli, Rustavi və Qardabani şəhərləri qapalı olaraq qalır. Rustavi və Qardabani mayın 14-də, Marneuli isə mayın 18-də açılacaq.
• Böyük ticarət mərkəzləri qapalı qalır.
• Paltar və ayaqqabı mağazaları bağlıdır.
• Gözəllik salonları və estetik mərkəzlər hələlik açılmayıb (iyunun 8-dən sonra işləməyə başlayacaqları gözlənilir).
• Stomatoloji klinikalar işləmir.
• Müxtəlif ofislərin əməkdaşları hələ də məsafədən çalışırlar.
• Məktəblər, uşaq bağçaları və ali təhsil müəssisələri bağlıdır. Bu semestr ərzində onların açılması nəzərdə tutulmayıb.
• Əyləncə mərkəzləri, kinoteatrlar, kafe və restoranlar işləmir (kafelərin açılışı iyunun 8-dən sonra gözlənilir. Bağlı restoranlar isə iyunun 22-dən açılmalıdır).
• İctimai nəqliyyat, o cümlədən də metro işləmir. Ancaq taksi hərəkət edir. Həmçinin şəhərlərarası nəqliyyat işləyir.
• Yalnız minik maşınlarında müəyyən qaydalara riayət etmək şərtilə hərəkət etmək mümkündür. Maşında üç nəfərdən (uşaqlar daxil) atrıq adamın olması ilə bağlı qadağa qüvvədə qalır – sürücü və arxa oturacaqda iki sərnişin. Qabaq oturacaqda sərnişinin oturması qadağandır.
•  — Saat 21:00-dan 06:00-a qədər komendant saatı qüvvədə qalır.
• Otellər hələ də qapalıdır – qonaq qəbul edə bilmirlər. Daxili turizm iyunun 15-dən açılacaq, həmin gündən mehmanxanalar qonaq qəbul edə biləcək.
• Gürcüstan səması hələ də bağlıdır. Beynəlxalq reyslərin iyulun 1-dən bərpa olunması planlaşdırılır. Həmin tarixdən Gürcüstan əcnəbi turistlərin qəbuluna da başlamaq niyyətindədir.

• Koronavirus Çinin Uhan laboratoriyasından çıxıb, yoxsa informasiya gizlədilib? Qərb Çini nədə günahlandırır?

Müxalifətin və vətəndaşların fikri

Gürcüstanda məhdudiyyətlərin aradan qaldırılmasının ilk mərhələsi aprelin 27-də qüvvəyə minib. Hökumətin bəyanına əsasən, məhdudiyyətlər mərhələli şəkildə ləğv ediləcək.

Gürcüstanda çoxları məhdudiyyətlərin aradan qaldırılmasını gözləyir. İctimaiyyətə və siyasi müxalifətə aydın deyil ki, niyə komendant saatı ləğv edilmir.

Müxalif Vahid Milli Hərəkat Partiyasının liderlərindən biri Roman Qotsiridze bildirir ki, iqtisadiyyat açılandan sonra komendant saatının saxlanması inandırıcı və məntiqli görünmür. O hesab edir ki, valyuta mübadiləsi məntəqələri açıq olmalıdır:

“Ölkədə minə qədər valyuta dəyişmə məntəqəsini açmağa nə mane olur? Bu gün 4 min insan evdə işsiz oturub və vətəndaşlarımızın çox böyük hissəsi zəhmətlə qazandığı pulları qətiyyən sərf etməyən məzənnə ilə banklarda dəyişməli olur”.

Azad Gürcüstan Partiyasının lideri Giorgi Vaşadze hesab edir ki, Gürcüstanda ictimai nəqliyyat işini bərpa etməlidir:

“Kommersiya təşkilatlarının çoxu açılır, insanlar işə gedə biəcəklər, amma biz indiyə qədər  bilmirik ki, niyə bizdə komendant saatı var? Biz ictimai nəqliyyat haqda heç nə bilmirik. Amma Avropada standartlar mövcuddur ki, onlara riayət olunan halda ictimai nəqliyyat işləməyə başlayır. Məsələn, əgər oturan sərnişinlər arasında məsafə gözlənilirsə”.

Amma bəzi vətəndaşlar məhdudiyyətlərin tələsik ləğvindən narahatdırlar:

“Biz qaydalara əməl etməyi sevmirik. Qorxuram ki, bizdə də Almaniyadakı kimi olsun və məhdudiyyətlər aradan qaldırılandan sonra yoluxanların sayı artsın”, – onlar Facebook-da yazırlar.

Gürcüstanda ilk koronavirusa yoluxma halı 2020-ci il fevralın 26-da qeydə alınıb. Martın 21-dən Gürcüstanda fövqəladı hal, martın 31-dən isə ümumi karantin rejimi elan olunub.