İlk köçkünlərin Şuşaya yerləşəcəyi tarix məlum oldu

“Güman edirəm ki, ən azından, gələn ilin yayında bir qisim insanın Şuşaya köçürülməsi baş verəcək”. Bunu “Report”a Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı İctimai Birliyinin sədri, Şuşa şəhərində qiymətləndirmə və inventarlaşdırma işləri ilə bağlı səfərdə olan Faiq İsmayılov deyib.

Onun sözlərinə görə, hazırda Şuşanın su təchizatı ilə bağlı az iş qalıb, bu istiqamətdə işlər yekunlaşır:

“Generatorlar vasitəsilə bütün şəhər işıqlandırılır. Şəhərdə 3-5 mərtəbəli binalar var ki, onlar dağıdılmayıb. Həmin binalar təmir olunmalıdır. Onlar asanlıqla bərpa olunacaq və insanlar tezliklə ora köçürüləcəklər”.

Qeyd edək ki, artıq şəhərdə şirniyyat və çörəkbişirmə sexləri fəaliyyətə başlayıb.