Son sutka ərzində Qarabağda bir neçə istiqamətdə, o cümlədən də Şuşa şəhəri ətrafında gərgin döyüşlər davam edib. Suriyanın SOHR təşkilatı suriyalı muzdluların Qarabağ münaqişəsi zonasına Azərbaycan tərəfdən iştirak etdiyini təsdqiləyib.
• Ağdərə, Ağdam və Xocavənd istiqamətlərində döyüşlər davam edib
• Azərbaycanın Müdafiə Nazirliyi Ermənistan tərəfinin Qarabağda Şuşa şəhərinin atəşə tutulması məlumatıı təkzib edib.
• Ermənistan hərbçiləri Azərbaycanın Tərtər, Ağcabədi və Ağdam rayonlarını artilleriya və raket atəşinə tutub.
• Azərbaycan prezidenti Twitter-də Fizuli, Cəbrayıl, Qubadlı, Zəngilan, Xocalı, Xocavənd rayonlarında daha 16 yaşayış məntəqəsinin Azərbaycan ordusunun nəzarəti altına keçdiyi haqda bildirib.
• Ermənistan silahlı qüvvələrinin Azərbaycanın Bərdə rayonunun Yeni Əyricə kəndinə atdığı mərmi yaşayış evinin üzərinə düşüb və 16 yaşlı yeniyetmə Şahmalı Ətraf oğlu Rəhimov həlak olub.
• Azərbaycanın Müdafiə Nazirliyi Azərbaycanın Qubadlı rayonu ərazisindən Ermənistanın Qafan şəhəri yaxınlığında David Bek kəndinin atəşə tutulduğunu təkzib edib: “Bu, təxribat xarakterli dezinformasiyadır. Azərbaycanın Ermənistan ərazisində heç bir hərbi hədəfi yoxdur”.
• “Ermənistan hərbçiləri bütün gün ərzində Ermənistan ərazisindən işğaldan azad edilmiş Qubadlı rayonunun kəndlərini və Azərbaycan ordusunun mövqelərini atəşə tutub” – Azərbaycanın Müdafiə Nazirliyi.
Yerevandan informasiya
• Bütün istiqamətlərdə döyüşlər davam edib, ən gərgin döyüşlər Şuşa – Daşaltı istiqamətində gedib.
• Bütün gün ərzində Qarabağın Şuşa şəhəri atəşə tutulub. Axşama doğru Stepanakertin “Qrad” və “Smerç” qurğularından yenidən atəşə tutulduğu haqda məlumat yayılıb.
• Martuni rayonunda vəziyyət gərgindir, bütün gün ərzində Azərbaycan hərbçiləri şəhəri artilleriya və raket atəşinə tutub.
• Könüllü dəstələri müdafiə ordusunun bölmələri ilə birlikdə Laçın istiqamətində Arpagədik kəndi ətrafında mühüm yüksəkliyi ələ keçiriblər.
• Ermənistan və Qarabağ ombudsmenlərinin ofisləri Azərbaycan tərəfindən Qarabağda mülki obyektlərə və yaşayış məntəqələrinin çox yaxınlığında, o cümlədən də Nnqi, Sqnax, Aknaxbür, Taqavard, Toq, Karin tak (Daşaltı) kəndlərinin 100 metrliyində yerləşən meşələrdə yandırıcı qarışıqlardan istifadə edildiyi haqda birgə hüsabat yayıb.
Daha əvvəl Qarabağ ombudsmeni bildirib ki, Azərbaycan qoşunlarının əməlləri üzündən artıq ən azı 1815 hektar meşə ərazisi yanıb.
SOHR təşkilatının Qarabağda suriyalı muzdlular haqda məlumatı
Suriya İnsan Haqlarına Əməl Olunmasının Monitorinqi Mərkəzinin (SOHR) saytı Qarabağda Azərbaycan tərəfdə döyüşən 12 muzdlunun cəsədinin vətəninə gətirildiyi haqda məlumat yayıb.
Bildirilir ki, Qarabağda silahlı münaqişə başlayandan ən azı 250 nəfər həlak olub. Onlardan 195 nəfərin cəsədləri Suriyaya gətirilib və ən azı üç nəfər suriyalı muzdlu Qarabağda əsirlikdədir.
Saytın məlumatına əsasən, Qarabağ münaqişəsi zonasına 2580 nəfərə qədər suriyalı döyüşçü aparılıb. Onlardan 342 nəfəri Suriyaya qayıdıb, onlar hərbi əməliyyatlarda iştirakdan və vəd edilmiş qonorardan imtina ediblər – SOHR yazıb.
Ermənistan prezidenti Türkiyə və Rusiyanın rolu haqda Belçika jurnalına müsahibəsində
“Əgər Türkiyə Qarabağ münaqişəsinə qarışmasaydı, onun əsas tərəfləri atəşkəsə razılaşacaqdı”, – Ermənistan prezidenti Armen Sarqsyan Belçikanın La Libre Belgique jurnalına müsahibısində bildirib.
“Türkiyə Suriyada, İraqda, Liviyada, Misirdə, Şərqi Aralıq dənizində geniş gündəmə sahibdir. Amma əsas hədəfi Avropadır. […] Türkiyə Xəzər dənizindən və Mərkəzi Asiyadan enerji resurslarının axınını nəzarətdə saxlamaq istəyir. […] Türkiyənin digər kozırı qaçqınlar [Türkiyədən Avropaya axın edə biləcək qaçqınlar] və terrorçulardır [Qarabağ münaqişəsində istifadə olunan]”.
“Rusiyanın həm Ermənistanla, həm də Azərbaycanla yaxşı münasibəti var. Və Türkiyədən fərqli olaraq, o, vasitəçi ola bilər”.
Sentyabrın 27-dən Azərbaycan və Ermənistan orduları Qarabağ münaqişəsi zonasında zirehli texnika, artilleriya və dronlardan istifadə edərək döyüş aparırlar. Hər iki tərəf bir-birini yaşayış məntəqələrinin atəşə tutulmasında günahlandırır. Hər iki tərəfdən hərbçilər və dinc sakinlər arasında minlərlə insan həlak olub. Bu müddət ərzində üç dəfə – 10, 18 və 26 oktyabrda atəşkəs imzalanıb, amma dərhal pozulub. Tərəflər bir-birini atəşkəsə əməl etməməkdə günahlandırır.
