Sentyabrdan Gürcüstan və Ukrayna daxili pasportla qarşılıqlı gediş-gəlişə icazə verəcək
[d
Sentyabrdan etibarən Ukrayna və Gürcüstan vətəndaşları bir-birlərinə xarici pasportsuz səfər edəcəklər, biometrik şəxsiyyət vəsiqəsi yetərli olacaq.
Müvafiq razılaşma iki ölkə nümayəndələri BMT Baş Assambleyasının sessiyasında iştirak etmək üçün Nyu Yorka yollanacağı zaman imzalanacaq, – “Novosti-Qruziya” xəbər verir.
Ukraynanın Gürcüstandakı səfiri İqor Dolqov jurnalistlərə bildirib ki, Ukrayna tərəfi artıq sənədləri təsdiqləyib və gürcüstanlı həmkarlarına təqdim edib ki, daxili biometrik pasportlarla (ID şəxsiyyət vəsiqələri) qarşılıqlı gediş-gəliş haqda saziş imzalansın.
“Biz vətəndaşların daxili pasportlarla gediş-gəlişi haqda sazişin mətninin Ukrayna tərəfinin aidiyyatlı qurumları tərəfindən razılaşdırıldığı haqda təsdiq almışıq. Bu mətn artıq rəsmi şəkildə Gürcüstan XİN-ə göndərilib. İndi hökumət imzalama haqda qərar qəbul etməli və müəyyən şəxsi bu sazişi imzalamaq üçün yetkiləndirməlidir”, – Gürcüstanın İctimai televiziyası İqor Dolqovdan sitat gətirib.
- Gürcüstan və Ukrayna vətəndaşlarının hər iki ölkəyə səfər etməsi üçün xarici pasportların ləğvi ilə bağlı ideyanı Ukraynanın baş naziri Vladimir Qroysman 2017-ci ilin noyabrında Tbilisidə səsləndirib.
- 2018-ci ilin fevralında məlum olub ki, Gürcüstan və Ukrayna hakimiyyətləri sürücülük vəsiqələrinin qarşılıqlı tanınması və mübadiləsi məsləsi üzərində də çalışır.
- Yeni şəxsiyyət vəsiqələri Gürcüstanda 2011-ci ildə qüvvəyə minib. ID kart insanı identifikasiya etməyə və Gürcüstanda hüquqi qüvvəsi olan elektron sənədlərdə elektron imzadan istifadə etməyə imkan verir.
- 2011-ci ildən Gürcüstan və Türkiyə vətəndaşları Gürcüstan-Türkiyə sərhədindən daxili pasportlarla keçə bilirlər.
