"Sadəcə rejim elə istədiyi üçün illərlə həbsdə qala bilərəm." Mziya Amaqlobelinin məhkəməsi yekunlaşmaq üzrədir

Gürcüstanda jurnalistin həbsi

“Ola bilsin ki, rejim istədiyi üçün bir neçə il həbsdə qalacam”, — deyə gürcü jurnalist Mziya Amaqlobeli 14 iyul tarixində keçirilən növbəti məhkəmə iclasında hakimin qarşısında bildirib.

Prosesin yekunlaşmasına 15 gündən az vaxt qalıb. Mziyanın hökmü 28 iyulda elan olunacaq.

• Gürcüstan: altı müxalifət lideri həbsdədir. Sonra nə olacaq?
• “Batumi bayraqdarı” Temur Katamadze Gürcüstandan Türkiyəyə deportasiya edilib

Vəkillərin vəsatətlərinə baxmayaraq, hakim Mziya Amaqlobeliyə təqsirləndirilənlər üçün nəzərdə tutulmuş şüşə kabindən çıxmağa və tribunadan ifadə verməyə icazə verməyib.

Nəticədə jurnalistin səsi zalda demək olar ki, eşidilmirdi. Həmişə məhkəmə proseslərində iştirak edən həmkarları sosial şəbəkələrdə yazıblar ki, Mziya özünün həbsinin və qəddar rəftarın ağır şərtlərini xatırlayarkən həyəcanlanırdı, səsi zaman-zaman qırılırdı, qəhər onu boğurdu. Zal gərgin səssizliyə bürünmüşdü və jurnalist Zurab Vardiaşvilinin sözlərinə görə, hər an “qəzəbdən partlaya” bilərdi.

Zal partlamadı, amma orada Mziyanın daha yüksək səslə danışmasına icazə verilməsini tələb edən jurnalistlərdən biri zaldan çıxarıldı. Çıxarılan jurnalist həyətə keçərək meqafon götürüb hakimin hərəkətlərinə etirazını oradan davam etdirib.

Bu, zalın içində aydın eşidilirdi, ona görə iclasın ortasında məhkəmə binanın digər korpusunda yerləşən daha kiçik zala köçürülüb.

Lakin Mziya Amaqlobelinin hiddətli həmkarının səsi ora da çatırdı.

Məhkəmə bundan sonra Amaqlobelinin işi üzrə bütün proseslərin yalnız 20 yerlik bu zalda keçiriləcəyini açıqlayıb.

Mziya Amaqlobelinin dindirilməsi canlı yayımlanmayıb və jurnalistlər onu kameraya çəkə bilməyiblər, çünki 30 iyundan etibarən məhkəmə zallarında, hətta vestibüllərdə belə, çəkiliş qadağan edilib.

Mziya Amaqlobeli məhkəmədə nə dedi

Mziya Amaqlobeli məhkəmədə danışıb ki, illər əvvəl dostu Eter Turadze ilə birlikdə Acarıstanda (Gürcüstanın cənub-qərbindəki region) müstəqil jurnalistikaya başlayıblar və “yaltaq, təbliğatçı sovet jurnalistikasından imtina ediblər”.

“Hökumətlər tənqidi jurnalistikaya dözümsüz yanaşır, lakin ölkədə müstəqil məhkəmə, söz azadlığı qanunla qorunduqda bu, o qədər də təhlükəli deyil, indiki vəziyyətimizdən fərqli olaraq”, – Mziya Amaqlobeli belə bildirib.

Gürcüstanın “Vahid Milli Hərəkat” lideri: “Ərim məni qorxutmaq üçün qaçırılıb”

“Vahid Milli Hərəkat” partiyasının lideri Tina Bokuçava bildirib ki, onun ərini uşaqların təhlükəsizliyi ilə şantaj ediblər.

Jurnalistin sözlərinə görə, onun işi ilə təxminən on təhqiqatçı məşğul olub, amma heç biri heç nə araşdırmayıb. Mziya Amaqlobeli iddia edir ki, ona şillə vurduğu üçün həbsinə səbəb olan Batumi polis rəisi İrakli Dqebuadze and içib ki, “ona qan udduracaq”.

“Bilmirəm, bəlkə rejim elə istədiyi üçün bir neçə il həbsdə qalacağam”, – deyə Mziya bildirib.

Jurnalist həmçinin 11-dən 12 yanvara keçən faciəli gecəni xatırlayıb. O, həmin vaxt bütün Gürcüstan boyunca keçirilən yüzlərlə etiraz aksiyasından birinə qatılmışdı. Amaqlobeli deyir ki, polis aksiyanı amansızcasına yatırmağa çalışır, istənilən şəxsi əsas göstərmədən saxlayır, iştirakçıları təxribata məruz qoyurdu.

“Səs-küyün necə qalxdığını xatırlayıram. Necə polisin və maskalı adamların mühasirəsinə düşdüyümü xatırlamıram. Həddindən artıq pis idim, nə baş verdiyini bilmirdim, polislə təkbətək qalmışdım. Bu, güc nümayişi idi. Məni irəli-geri itələyirdilər.

Arxadan güclü zərbə hiss etdim, yıxıldım və bir neçə saniyəliyinə huşumu itirdim. Bilmirəm, kim məni ayıltdı”, – deyə Mziya Amaqlobeli özünü itirdiyi anları təsvir edir.

Jurnalistənin sözlərinə görə, məhz bu səbəbdən o, polis rəisinə şillə vurub:

“Öz davranışınıza heyrət etdiyiniz olubmu? Təəssüf etdiyimi düşünməyin. Belə deyil. Bu baş veribsə, qaçılmaz idi, başqa cür davrana bilməzdim. Bu, təhqiramiz, alçaldıcı, yekəxana və kinayəli münasibətə impulsiv reaksiya idi”.

Jurnalist həmçinin həbsdən sonra İrakli Dqebuadzenin ona qarşı söyüşlər söydüyünü, təhqir etdiyini, hətta üzünə tüpürdüyünü xatırlayıb.

• Gürcüstanda müxalif siyasətçilərin həbsi və “Gürcü Arzusu”nun istintaq komissiyası: növbədə nədir?
• Gürcüstanda etirazçıların cərimələrinin ödənilməsi üçün “Azadlıq Fondu” yaradılıb

İclasın nəticələri

14 iyul iclasında hakim vəkillərin “Gürcü Arzusu” partiyasından baş nazirin müavini Irakli Kobaxidze və millət vəkili Nino Tsilosaninin şahid qismində dindirilməsi barədə vəsatətini təmin etməyib.

İrakli Kobaxidze dəfələrlə təqsirsizlik prezumpsiyasını kobud şəkildə pozaraq seçiciləri inandırmağa çalışıb ki, Mziya Amaqlobeli polisin nüfuzuna xələl gətirmək üçün kiminsə sifarişi ilə hərəkət edib. Eyni iddianı Nino Tsilosani də səsləndirib.

Mziya Amaqlobelinin işi üzrə məhkəmə prosesi yekunlaşmaq üzrədir. Hələ iki iclas qalır: 21 və 28 iyul, məhz həmin gün hökm oxunmalıdır.

Gürcüstanda jurnalistin həbsi