Rusiya Bakıya reyslərin sayını artırır və Azərbaycanı təyyarələrinin həbsində günahlandırır
Ukraynada müharibə başlayandan dərhal sonra Rusiya hakimiyyəti “Aeroflot” aviaşirkətinin təyyarələrinin Azərbaycana uçuşunu dayandırıb. Təxminən üç həftə sonra bu qərar ləğv edilib, amma Rusiya hökuməti Azərbaycan hakimiyyətini təyyarələrinin həbsində günahlandırıb. Azərbaycan bu bəyanatla bağlı öz təəccübünü ifadə edib.
- Əliyev və Blinken nə haqda danışıblar?
- Rusiyaya qarşı sanksiyalar: Ermənistanda nə danışırlar?
- “Ermənistandan Xankəndiyə qaz kəməri qanunsuzdur” – Bakıdan şərh
Rusiyanın bəyanatı və Azərbaycanın təəccübü
Rusiya aviaşirkətinin 80-ə yaxın təyyarəsi ölkəyə qarşı tətbiq olunan sanksiyalara görə xaricdə həbs edilib – ötən gün “İnterfaks” RF nəqliyyat naziri Vitali Savelyevə istinadən məlumat yayıb.
“Bizdə ölkədə ümumilikdə (sanksiyadan əvvəl – İF) 1,367 təyyarə vardı. Biz 78 maşını itirmişik, onlar uçuşlar zamanı həbs ediliblər”, – Savelyev Federasiya Şurasın iqtisadi siyasət komitəsinin iclasında deyib.
“Laynerlər həmçinin RF-yə dost ölkələrdə – Türkiyə, Azərbaycan, Ermənistanda da həbs edilib”, – o qeyd edib.
Bu bəyanat Azərbaycan hökumətində təəccüblə qarşılanıb.
“Rusiya Federasiyası Nəqliyyat Nazirliyi tərəfindən Azərbaycanda Rusiya təyyarələrinin həbs edilməsi barəsində verilmiş açıqlama həqiqəti əks etdirmir və təəccüb doğurur”, – bu barədə Rəqəmsal İnkişaf və Nəqliyyat Nazirliyinin Mətbuat xidmətindən Trend-in sorğusuna cavab olaraq bildirilib.
“Azərbaycanda Rusiya Federasiyasına məxsus təyyarələr üzərində həbs qoyulmayıb. Rusiyanın aidiyyəti təşkilatlarını həqiqəti əks etdirməyən bu məlumatı təkzib etməyə çağırırıq”, – məlumatda deyilir.
Biz bu materialı çapa hazırladığıız müddətdə Rusiya Nəqliyyat Nazirliyi “yanlışa” görə Azərbaycan tərəfindən üzr istəyib.
“Rusiya aviaşirkətlərinin təyyarələri Azərbaycanda həbs edilməyib. Bu informasiya yanlışdır. Azərbaycan Respublikasından olan həmkarlarımızdan üzr istəyirik”, – Rusiya Nəqliyyat Nazirliyindən bildirilib.
Aviareyslərin qiymətləri bahalaşıb
“Aeroflot” aviaşirkətinin təyyarələrinin Azərbaycana uçuşu qadağan olunan dövrdə Moskvadan Bakıya ancaq Utair təyyarələrində gəlmək mümkün idi. Reyslər sutkada bir dəfə həyata keçirilirdi.
Bu arada Azərbaycanın aviadaşıyıcıları da Rusiya şəhərlərinə uçuşları dayandırıblar. Azərbaycanın AZAL dövlət şirkətində bu qərarı sığorta riskləri ilə izah ediblər, çünki Rusiyanın hava məkanında uçuşlar Qərb şirkətləri tərəfindən sığortalanmır.
Yaxın günlərdə “Aeroflot” Bakıya uçuşları bərpa edəcək. Baxmayaraq ki, reyslər hər gün olacaq, qiymətlər “dağ başındadır”.
Ukraynada müharibə başlayana qədər Bakıdan Moskvaya və geri uçuş sərnişinlərə 205 ABŞ dollarına başa gəlirdi.
JAMnews aprelin ortası üçün Moskva-Bakı-Moskva uçuşu üçün qiymətləri yoxlayıb. Yüklə birlikdə uçuş üçün 470 dollar ödəmək lazım olacaq. Bu o deməkdir ki, qiymətlər iki dəfədən çox bahalaşıb.
Ekspert rəyi
“Rusiyanı Azərbaycanla birləşdirən aviareyslərə tələbat çoxdur. Bu. Rusiyada nəhəng Azərbaycan diasporunun olması ilə izah olunur, o cümlədən də karantin tədbirlərinə görə sadə insanlar üçün başqa heç bir nəqliyyat əlaqəsi qalmayıb. Rusiyadan avtomobil və qatarlarla Azərbaycana gəlmək mümkün deyil.
Rusiyaya qarşı Qərb sanksiyalarının ilk günlərində, “Aeroflot” Bakıya reysləri dayandırdığını elan etdiyi zaman Moskvada Azərbaycan paytaxtında biletin qiyməti 3500 dollara çatmışdı. Bu, bir uçuş mənim yadıma gələn rekord məbləğdir.
Rusiya tərəfinin Bakı aeroportunda təyyarələrin həbsi ilə bağlı iddiası tənqid qarşısında acizdir. Rusiya aviaşirkətləri Azərbaycana istisnasız öz təyyarələri, yaxud Qərbin lizinq şirkətlərinə məxsus olmayan təyyarələrlə uçurlar. Hamı Yerevanda enməli olan, amma Mineralnıe vodı şəhərinə uçub gedən təyyarə ilə bağlı hadisəni xatırlayır. Düşünmürəm ki, Rusiya aviaşirkətləri həbs riski ilə Bakıya təyyarə göndərərdilər.
“Aeroflot” aviareyslərinin bərpa olunmasına gəlincə, bu gün mən Rusiya mətbuatında köhnə “İl-86” və “İl-96” təyyarələrində uçuşların bərpası haqda oxudum. “İl-86” çoxdan istehsaldan çıxarılıb və təxminən son on ildə bu təyyarələrlə uçan olmayıb. Şəxsən mən belə təyyarəyə minməyə risk etməzdim.
Reyslərin qiymətlərinə gəlincə, bu, elementar iqtisadiyyat qanunudur – təlabat çox yüksəkdir, biletin dəyərini də bu müəyyən edir. Həmçinin unutmayaq ki, Rusiya aviaşirkəti bütün tarixi boyunca ən ağır dövrlərini yaşayır və hər şeydə pul qazanmağa çalışır”, – Rusiya aviaşirkətlərinin Bakıya uçuşları ilə bağlı vəziyyəti azərbaycanlı ekspert Vəli Məmmədli şərh edib.
