Orada qurbağalar özlərini hamıdan yaxşı hiss edir
Abxaziyada tibb çox ağır vəziyyətdədir. Tək mülki deyil, həm də hərbi. Göz oxşamayan mənzərələrdən biri də faktiki olaraq xarabalığa çevrilən Aqudzera hərbi hospitalıdır.
Palatalar bərbad vəziyyətdədir. İstilik sistemi yoxdur, yayda yenə birtəhər dözüləsidir, qışda isə çox soyuq olur. Həkimlər imkan düşdükcə, elektrik sobaları gətirirlər.
Yanğından mühafizə sistemi yoxdur, elektrik naqilləri isə bir neçə yerdə suyun içindədir, istənilən an qısaqapanma ola bilər. Suyla vəziyyət əladır, o həmişə axır, çünki əksər kranlar xarab olub və bağlanmır.
Burada lift çoxdan işləmir.
Bu xəstəxananın ən böyük problemi tamamilə su və zibil içində olan zirzəmidir. Biz baxmaq üçün ora düşəndə qurbağalar üstümüzə hoppanırdı.
Hospitalın könül oxşayan yeganə infrastrukturu böyük bağdır. Amma o da baxımsızdır.
Bununla belə, Aqudzera hərbi hospitalında buranı tərk etmək istəməyən və qətiyyətlə dəyişikliklərə nail olmaq istəyən bir neçə gənc həkim işləyir.
Həkim Quram Şoua deyir ki, xəstəxana binası 1990-cı il müharibəsi zamanı necə yanıbsa, elə o vəziyyətdə də qalıb. Şoua öz iş yoldaşları ilə birlikdə xəstəxananı təmizləyib. Deyir ki, əmək haqqı kimi bir ədəd çörək və bir qutu yağ alırdılar.
Bu yaxınlarda həkimlər “atışıb yeni asma tavan alıb quraşdırıblar – öz pullarına.
“Bircə müharibə olmasın, biz nə lazımdır, edərik. Biz burada özümüz rəngsazlıq, suvaq işləri görürük. Bu, yəqin müharibə sonrası sindromdur, amma nə etmək olar. Əslinə qalsa, bura ümumiyyətlə heç nəyə yaramır. Söküb, yerində təzə korpus tikmək lazımdır. Hazırda bizim xəstəxanada 40 həkim işləyir. Neyrocərrahiyədən başqa, hər şeyi bacarırıq, – həkim Quram Şoua deyir.
Abxaziyada ilk kompüter tomoqrafı məhz bu hospitalda quraşdırılıb. İlk dəfə məhz burada lazerlə uroloji və endoskopik əməliyyatlar ediblər.
Həkimlərin əmək haqqı isə on min rubldur [$150].
Onlardan biri də Anri Arnautdur. O, hərbi hospitalda internatura keçir və burada iş onun üçün mütləqdir.
“Mən hər gün Qudautadan Aqudzeraya işə gəlirəm. İndi şöbəmizdə ancaq altı xəstə yatır və onların hər birinə kifayət qədər diqqət yetirmək imkanım var, – Anri deyir.
Laşa Kakaliya hələlik stajçıdır, Rostov Dövlət Universitetində təhsil alır, gələcəyin cərrahıdır. Hələ iki il də oxuyacaq. “Düzdür, iş çətindir, amma burada hamı mənə kömək edir. Rusiyada heç bir tələbə belə təcrübə keçmir.
Artıq qayıdarkən pilləkəndə qarşımıza çıxan xəstəxananın feldşeri xəbər aldı: “Siz dəqiq bütün pis yerləri çəkdiz? Biz ümid edirik ki, bunu kimsə görəcək və nəhayət, xəstəxanamıza kömək edəcəklər.
Aqudzera hərbi hospitalı güc strukturları, həm də Sərhəd və Gömrük xidmətlərinin və Fövqəladə Hallar Nazirliyinin əməkdaşları üçün çoxprofilli xəstəxanadır. Şöbələrdə ayrı-ayrı adamlar və təşkilatların bağışladığı yaxşı avadanlıq var. Çətin əməliyyatlar edilir, ambulatoriya və hərbi-həkim ekspertizası şöbəsi də var.
Amma burada ildən ilə tikinti aparanlar yalnız yarısökülmüş damın altında yuva quran quşlardır.
Məqalədə yer alan fikirlər müəllifin terminologiyası və baxışlarını ifadə edir və redaksiyanın mövqeyi ilə üst-üstə düşməyə bilər.
Dərc edilib: 27.04.2016
