Müstəqil jurnalistlər “Media haqqında” qanunun ləğvini tələb edirlər
Media Reyestrinə etirazlar
“Media haqqında” qanuna və Media Reyestrinə etiraz edən müstəqil jurnalistlər qrupu bununla bağlı ictimai dinləmələr təşkil edib. Jurnalistlər yeni qanunun ifadə azadlığını boğmağa, müstəqil medianı tamam məhv etməyə yönəldiyini bir daha ictimaiyyətin diqqətinə çatdırıblar. Elə həmin gün MEDİA rəhməri Əhməd İsmayılov reyestrdən keçməyən jurnalistlərin öz fəaliyyətlərinə davam edə biləcəklərini deyib. Amma müstəqil jurnalistlər hesab edirlər ki, bu, narazıları arxayın salmaq üçün növbəti manipulyasiyadır.
- Lavrov: “Qərb Moldovanı “növbəti Ukrayna” roluna nəzərdən keçirir, Gürcüstan müqavimət göstərir”
- “İslamın Azərbaycan cəmiyyətinə böyük təsiri yoxdur”. Bu nə deməkdir?
- Azərbaycanda maaşlar 15 faiz, qiymətlər isə 30 faiz artıb. Ekspert şərhi
MEDİA rəhbərinin təzadlı açıqlamaları
Fevralın 6-da Milli Məclisin İqtisadi siyasət, sənaye və sahibkarlıq komitəsinin iclasında Medianın İnkişafı Agentliyinin (MEDİA) icraçı direktoru Əhməd İsmayılov bildirib ki, “media resyestri kiminsə jurnalist olmasını təyin etmir”.
Onun sözlərinə görə, jurnalistlər media reyestri olmadan da fəaliyyətini davam etdirə bilərlər:
“Sadəcə, kimsə özünü media reyestrində qeydiyyatdan keçirmək istəyirsə, həmin jurnalistlər dövlətin verdiyi müəyyən imtiyazlardan istifadə edə bilirlər. Bir daha qeyd edirəm ki, media reyestrindən qeydiyyatdan keçmək məcburi xarakter daşımır, qətiyyən media reyestrində olmayan jurnalistin fəaliyyəti məhdudlaşmır”, – Əhməd İsmayılov belə deyib.
Elə həmin gün Mətbuat Şurasının iclasında isə Əhməd İsmayılov tam əks açıqlama verib. O, bildirib ki, Media Reyestrindən keçməyən media qurumu fəaliyyət göstərə bilməyəcək.
Onun sözlərinə görə, Azərbaycanda fəaliyyət göstərən bütün media qurumları reyestrdən keçməlidir: “Biz bununla bağlı media subyektlərinə 6 ay müddət müəyyən etmişik. 6 ay müddətində hansısa media subyekti Media Reyestrindən keçmirsə, biz həmin qurumu aşkarlayıb, onun barəsində məhkəməyə müraciət edəcəyik. Məhkəmə də həmin media subyektinin fəaliyyətinə xitam verəcək”.
Xatırladaq ki, o, daha əvvəl də reyestrdən keçməyə jurnalistləri məhkəmə ilə hədələmişdi.
Media Reyestrində qeydiyyatdan keçmək üçün media orqanlarına və jurnalistlərə verilən 6 ay möhlət mart ayında bitir.
“Venesiya Komissiyasının rədd etdiyi qanun ləğv edilməlidir”
Eyni gündə bir qrup müstəqil jurnalist və media eksperti tərəfindən təşkil olunmuş ictimai dinləmələrdə Əhməd İsmayılovun bir-birinə zidd açıqlamaları manipulyasiya adlandırılıb.
“Deyirlər ki, media qurumlarının reyestrdən keçməsi məcburidir, amma müstəqil jurnalistlərin keçməsi könüllüdür. Gəlin baxaq, könüllüdürmü? Jurnalist gedir küçədə sorğu keçirməyə, polis yaxınlaşır, kim olduğunu soruşur və axtarır, reyestrdə adı yoxdursa, onu jurnalist hesab etmir. Əhməd İsmayılov özü də bir dəfə demişdi ki, reyestrdən keçməmisənsə, deməli, jurnalist deyilsən. Bunun özü polislərə əsas verir ki, jurnalistə rahat şəkildə mane olsun”, – deyə “Meydan TV”nin redaktoru Aynur Elgünəş bildirib.
Media hüququ üzrə ekspert Ələsgər Məmmədli mövzunun niyə indi gündəmə gəlməsi ilə bağlı suallara aydınlıq gətirib. O bildirib ki, ümumiyyətlə, qanun qəbul ediləndən gündəmdən düşməyib, sadəcə, düşünülürdü ki, Venesiya Komissiyasının mənfi rəyindən sonra qanunun tətbiqi dayandırılıb.
“Venesiya Komissiyası rəyində bildirib ki, bu qanun Avropa İnsan Hüquqları Konvensiyasına ziddir. Konvensiya yalnız teleradio sahəsinin lisenziyalaşmasını uyğun görür, bunun xaricində heç bir medianın xüsusi icazə sisteminə tabe olmasını dəstəkləmir. İstənilən bu tip icazə media azadlığına müdaxilədir. Bütün bunlar gerçək medianın ləğvinə, yalnız ələbaxan medianın fəaliyyətinin mümkünlüyünə atılmış addımdır”, – deyə Ələsgər Məmmədli bildirib.
Avropa, yoxsa Mussolini təcrübəsi?
MEDİA təmsilçiləri isə dəfələrlə qeyd ediblər ki, Avropa ölkələrində də media orqanlarının və jurnalistlərin reyestrinin tutulması təcrübəsi var. “Toplum” portalının baş redaktoru Xədicə İsmayıl bu hökumətin bu arqumetini araşdırıb.
“Hökumət həm də deyir ki, bununla bağlı Avropa təcrübəsi var. Mən araşdırdım. İtaliyada varmış. Mussolininin dövründə media reyestri yaradıblar, o vaxtdan var. Mussolinin dövründə icazə sistemi idi, indi isə ancaq qeydiyyat sistemidir. Bu nümunələrdən istifadə edirlər”, – deyə Xədicə İsmayıl vurğulayıb.
“Turan” İnformasiya Agentliyinin rəhbəri Mehman Əliyev qeyd edib ki, “Media haqqında” qanun təkcə mətbuata yox, bütöv media cəmiyyətinə şamil olunur.
“Ona görə də bu təkcə bizim problemimiz deyil, bütün cəmiyyətin problemidir və cəmiyyət özü buna sözünü bildirməlidir. Siyasi partiyalar, qeyri-hökumət təşkilatları və birinci növbədə fərdlər də buna münasibət bildirməlidirlər. Çünki qanunda konkret yazılıb ki, əgər istehsal olunan informasiya iki tərəf arasında yayılırsa, bu, kütləvi informasiya deyil. Əgər üçüncü, beşinci tərəf bunu görüb oxuyursa, deməli, kütləvi informasiyadır. Beləliklə, siz hamınız bu qanunun təsiri altına düşürsünüz. Ona görə də bu qüsurlu qanundur və dəyişməlidir. “Media haqqında” qanun informasiya cəmiyyətinin inkişafının qabağını alan bir qanundur və bu, cinayətdir”, – deyə Mehman Əliyev vurğulayıb.
Bakı “Press klub”unun rəhbəri Arif Əliyev isə bildirib ki, hazırda Media Reyestrinin müzakirəsi ön plana çıxsa da “Media haqqında” qanunda təhlükəli məsələlər çoxdur. O hesab edir ki, qanun ləğv edilməlidir.
“Bu qanun həm hökumətə, həm mediaya, həm də bütün cəmiyyətə böyük başağrısı olacaq”, – deyə o bildirib.
Müzakirədə iştirak edənlər atacaqları növbəti addımlar haqda danışıblar. Onlar Venesiya Komissiyasının rədd etdiyi bu qanuna beynəlxalq ictimaiyyətin diqqətini çəkmək, ölkə Konstitusiyasına zidd olduğu üçün qanunu Konstitusiya Məhkəməsində mübahisələndirmək niyyətindədirlər.
