Moskva meri: “Koronavirus xəstələrinin sayı əslində xeyli daha çoxdur”
Rusiyada kütləvi test almağa başlayırlar, hər gün minlərlə insanı yoxlamaq nəzərdə tutulub. Ekspertlər bədbindir
Əsas mənbələr – Медиазона, BBC
Rəsmi məlumata görə, martın 25-i səhər saatlarına qədər Rusiyada koronavirusa yoluxanların sayı 495 nəfərə çatıb.
Amma yoluxanların real sayı rəsmi açıqlanandan daha yüksəkdir – Moskva meri Sergey Sobyanin prezident Vladimir Putinlə görüşü zamanı bildirib.
“Hazırda [yalnız Moskvada] 500 nəfərə yaxın xəstə var. Sadəcə bir hissəsi təsdiqlənməmiş hallardır. Real olaraq xəstə olanların sayı xeyli daha çoxdur.
Regionlarda isə testdən keçirmə miqyası ümumiyyətlə çox aşağıdır və real mənzərəni heç kim bilmir”, – Sobyanin deyib.
Moskva meriyasını testlərin yalnız çox sayda yoluxanların olduğu ölkələrdən qayıdanlar üçün əlçatan olduğuna görə tənqid edirlər.
Amma Moskva hakimiyyəti ümumrusiya səviyyəsində qəbul olunan qaydalar üzrə davranır.
Hərçənd vəziyyətin artıq bir neçə gün ərzində dəyişəcəyi gözlənilir.
- Rusiyanın yeni konstitusiyası: “daimi” Putin, Tanrı və rus xalqının xüsusi rolu. Bütün bunlar nə deməkdir?
- İkonavirus. Rusiyada dünya pandemiyasından müqəddəs nəşi kütləvi şəkildə öpməklə qorunurlar
- “Televizordan sonra əllərinizi yuyun” – ölməyə kömək edən feyklər
Martın 20-də Rusiya hökuməti koronavirus testlərinin sadələşdirilmiş qaydada alınmasına imkan verən sənəd qəbul edib.
Testlərin gətirilməsi üçün yalnız bir şirkət – “SmartLifeCare” lisenziya alıb. Bu şirkət testləri Yaponiyanın “K.K.Mirai Genomics” şirkətinə aid olan “Evotec-Mirai Genomics” Rusiya-Yaponiya şirkətindən alır.
Müqavilədə hakimiyyətlə bağlı iri biznesin maraqlarının olduğu mümkündür. BBC-nin əldə etdiyi məlumata görə, “SmartLifeCare” Rusiyanın birbaşa investisiya fonduna sərmayə yatırmaq niyyətindədir. Bu fondun nəzarət paketi Aleksey Kozlova məxsusdur, o isə Rusiyanın ən iri neft-kimya şirkəti olan “Sibur Holding”in idarə heyətinin üzvüdür.
Verilən məlumata görə, Moskva meriyası “SmartLifeCare” şirkətindən 192 milyon rubl [2,5 milyon dollara yaxın] dəyərində test-sistemlər və testlər alıb.
Artıq bir neçə gündən sonra Rusiya paytaxtında sutkada on minə qədər test keçirmək planlaşdırılır.
Bunun üçün Moskvada məhz bu testlərin keçiriləcəyi doqquz laboratoriya açılır.
İdealda şəhər sutkada 25-28 min testə yüksəlmək istəyir – meriyadakı mənbə BBC-ə bildirib.
Rusiyanın Çinlə sərhədi var və bu sərhəd bağlı deyildi. Az əvvələ qədər koronavirus pandemiyasının tüğyan etdiyi digər ölkələrlə də sərhədlər bağlanmamışdı.
Ekspertlər rusiyalıların kütləvi şəkildə testdən keçirilməsinin Rusiyada koronavirusla bağlı daha real və daha bədbin mənzərəni ortaya çıxaracağını gözləyirlər.
