“Məni və övladlarımı ölümlə təhdid edirlər” - Gürcüstan prezidentliyinə hökumətyönlü namizəd iddia edir
Hakimiyyətin dəstəklədiyi prezidentliyə namizəd Salome Zurabişvili fövqəladə brifinqdə bildirib ki, onu övladlarını öldürməklə təhdid edirlər.
Namizədin sözlərinə görə, o və övladları telefon təhdidini “Milli Hərəkata” yaxın olan hərbçilər tərəfindən alıblar.
•Salome Zurabişvili kimdir? – Gürcüstanda iqtidar partiyasının ilk məğlubiyyəti
•Gürcüstan prezidentini seçir – son dəfə ümumxalq səsverməsi ilə
“Onlar bizim ünvanımıza çox naxoş ifadələr işlədirdilər: “Alınızdan güllə çaxarıq”, “Qanınızı içərik””, – Zurabişvili deyib. Onun sözlərinə görə, bu, real təhdid olub və hüquq-mühafizə orqanları baş verənlərə operativ reaksiya verməlidir.
Prezidentliyə namizəd bildirib ki, həmsöhbətlər identifikasiya edilib, onlar müxalif “Milli Hərəhatla” əlaqəli olan hərbçilərdir
Oktyabrın 28-də Gürcüstanda prezident seçkiləri baş tutub. Seçkilərin nəticələrinə görə, ikinci tur təyin edilib və dekabrın 2-ə qədər baş tutması ehtimal olunur. Dəqiq tarix hələ elan olunmayıb.
Hakimiyyətyönlü namizəd Salome Zurabişvili və müxalifətçi Qriqol Vaşadze birinci turda demək olar ki, bərabər sayda səs qazanıblar – müvafiq olaraq 38,4% və 37,73 faiz.
“İstənilən dövlət üçün qadının və uşaqların təhdid edilməsi, hərbçilərin, yəni ləyaqət və kişilik rəşadətinin rəmzi olan qüvvənin manipulyasiya olunması rüsvayçılıqdır”, – Zurabişvili vurğulayıb.
Zurabişvilinin sözlərinə görə, onun başına gələnlər Gürcüstanda gərginliyə və nifrətin qızışdırılmasına doğru atılan növbəti addımdır. O bildirib ki, bütün bunların arxasında daxili və xarici liderləri, tele-aparıcıları ilə birlikdə “Milli Hərəkat” və onların tərəfdarları dayanır. [Xarici lider deyəndə Zurabişvilinin hazırda Hollandiyada yaşayan və seçki kampaniyasında “distant” iştirak edən Mixail Saakaşvilini nəzərdə tutduğu ehtimal olunur — JAM-news].
Prezidentliyə namizədin sözlərinə görə, aldığı təhdidlərlə bağlı o, artıq Daxili İşlər Nazirliyinə və digər strukturlara müraciət edib ki, vəziyyətin stabilliyini pozmaq cəhdlərinin qarşısı zamanında alınsın.
