“Laçın SBM-nin atəşə tutulması Qarabağ ermənilərinə çətinliklər yaradır”
Azərbaycan-Ermənistan sərhədində gərginlik
Ermənistan və Azərbaycan arasında sərhəd boyunca müxtəlif istiqamətlərdə iki gündür davam edən silahlı toqquşmalar ABŞ Dövlət Departamentini narahat edib. Azərbaycanlı ekspertlər isə hesab edirlər ki, Laçın sərhəd buraxılış məntəqəsinin atəşə tutulması “ilk növbədə Qarabağda yaşayan ermənilərə çətinliklər yaradır, buna görə də, onların bütün iradları Ermənistan tərəfinə yönəlməlidir”.
- “Qobu Park” sakinlərinin həyatı təhlükədədir?
- Gürcüstanda əlillərə qarşı zorakılıqla mübarizə üçün nə lazımdır? Tədqiqat
- “Azərbaycanı Brüsseldə daha yaxşı görür və eşidirlər” – erməni politoloq
Nə baş verib?
İyunun 15-də Ermənistan və Azərbaycan silahlı qüvvələri arasında dövlət sərhədinin müxtəlif istiqamətlərində müxtəlif çaplı silahlardan atışmalar baş verib.
İlk gərginlik səhər saat 9 radələrində “Laçın” sərhəd buraxılış məntəqəsinin yaxınlığında yaşanıb. Ermənistan tərəfinin atəşi nəticəsində Azərbaycan sərhədçisi yaralanıb.
Azərbaycan Müdadiə Nazirliyinin məlumatına görə, iyunun 16-na keçən gecə Ermənistan Silahlı Qüvvələrinin bölmələri Azərbaycan ordusunun Gədəbəy rayonunun Qalakənd yaşayış məntəqəsi, Qarabağda yerləşən qanunsuz silahlı dəstələr isə Şuşa rayonu istiqamətindəki mövqelərini fasilələrlə atəşə tutublar.
Eyni qurumun növbəti məlumatında isə səhər saatlarında Ermənistan Silahlı Qüvvələri bölmələrinin Arazdəyən (Yerasx) yaşayış məntəqəsi istiqamətindəki mövqelərindən Azərbaycan ordusunun Naxçıvan Muxtar Respublikası Sədərək rayonunun Heydərabad yaşayış məntəqəsi istiqamətindəki mövqelərini müxtəlif çaplı silahlardan atəşə tutduğu bildirilib.
“Azərbaycan ordusunun bölmələri cavab tədbirləri görürlər”, – məlumatlarda deyilir.
Ermənistan Müdafiə Nazirliyi isə Azərbaycan tərəfinin Yerasx istiqamətindəki erməni mövqeyini atəşə tutduğu haqda məlumat yayıb.
Həmişə olduğu kimi, tərəflər gərginliyin yaşanmasında bir-birini ittiham edir.
Azərbaycan XİN-in bəyanatı
Laçın yolunda baş vermiş insidentlə bağlı Azərbaycan Xarici İşləri Nazirliyi bəyanat yayıb. Bəyanatda deyilir:
“Bu hərbi təxribat Azərbaycanın suverenliyi və ərazi bütövlüyünə qarşı təcavüz olmaqla yanaşı, Azərbaycan tərəfdən sərhəd buraxılış məntəqəsinin uğurlu fəaliyyətinə, erməni sakinlərin təhlükəsiz, sərbəst və maneəsiz keçidinə, habelə Laçın yolu ilə hərəkətinə maneçilik törətmək məqsədi daşıyır.
Buraxılış məntəqəsindən erməni sakinlərin heç bir çətinlik olmadan sərbəst hərəkətini həzm edə bilməyən Ermənistanın bu hərbi təxribatı onun Azərbaycanla münasibətlər qurmaqda və sülh prosesində maraqlı olmadığının bariz nümunəsidir”.
ABŞ Dövlət Departamentinin reaksiyası
ABŞ Dövlət Departamenti də Laçın rayonunda Ermənistan-Azərbaycan sərhədində atışma ilə bağlı son hadisələrə reaksiya verib.
“Biz, Ermənistan-Azərbaycan sərhədi boyunca Laçın yaxınlığında atışmanın şəxsi heyətin yaralanmasına səbəb olmasından çox narahatıq”,- rəsmi nümayəndə Metyu Miller “Turan”ın Vaşinqton müxbirinə bildirib.
“Biz öz bəyanatımızı təsdiqləyirik ki, tərəflər sərhəd boyunca döyüşlərdən çəkinməlidirlər, möhkəm və layiqli sülh sazişinin bağlanması üzərində işlədikləri üçün Laçın dəhlizindən azad və açıq tranzit bərpa olunmalıdır. Biz tərəflərin tezliklə görüşünü səbirsizliklə gözləyirik”.
Bu, Yerevanın Naxçıvanla sərhəddə insident barədə məlumat verməsindən bir gün sonra baş verib. Ermənistanda Amerika investisiyaları ilə inşa edilən poladtökmə zavodunda çalışan iki nəfər Hindistan vətəndaşı yaralanıb.
“Biz Azərbaycan tərəfdən atəş nəticəsində Ermənistandakı ABŞ-a bağlı şirkətin iki mülki əməkdaşının yaralanmasından çox narahatıq”, – Metyu Miller Tvitterdə yazıb.
Azərbaycan Xarici İşlər Nazirliyinin mətbuat katibi Ayxan Hacızadə Tvitterdə buna cavab olaraq yazıb: “Biz Ermənistanda tikilən metallurgiya zavodundakı mülki işçilərə qarşı əsassız ittihamları rədd edirik. Bir qayda olaraq, bu, Ermənistanın çaşqınlıq yaratmaq və diqqəti öz hərbi təxribatlarından və zavodun mənfi transsərhəd təsirindən yayındırmaq üçün növbəti uydurmasıdır”.
Ekspert rəyləri
“Laçında atəşkəsin pozulması konkret olaraq reinteqrasiya prosesinə zərbə vurmaq üçündür. Çünki erməni vətəndaşlarımızın Azərbaycan cəmiyyətinə inteqrasiya prosesi gündəmdədir. İkincisi, ayın 14-də ikinci böyük mərhələdə Laçına qayıdış prosesinə start verildi. Bir növ “qayıdan əhalini qorxutmaq lazımdır” prinsipindən çıxış edirlər”.
Bu fikirləri Sosial Tədqiqatlar Mərkəzinin (STM) mətbuat katibi, siyasi şərhçi Əziz Əlibəyli deyib.
“Bununla Azərbaycanı təxribata çəkmək istəyirlər. Bu mənada antiterror əməliyyatı üçün vaxtın yetişdiyini biz Laçın sərhəd-buraxılış məntəqəsinin gülləbaran edilməsi ilə də görə bilərik”, – deyə o əlavə edib.
“Atlas” Araşdırmalar Mərkəzinin rəhbəri Elxan Şahinoğlunun da fikrincə, Ermənisitan ordusunun Laçın sərhəd-keçid məntəqəsinə qarşı təxribatı Qarabağ ermənilərinə zərər vurub:
“Ermənilər bu sərhəd keçid məntəqəsindən istifadə edərək Qarabağdan çıxa və qayıda bilərlər. Təxribat nəticəsində sərhəd-keçid məntəqəsi fəaliyyətini müvəqqəti dayandırıb. Nəticədə, ermənilər sərhəd-keçid məntəqəsindən istifadə edə bilməyiblər. Sərhəd-keçid məntəqəsi fəaliyyətini bərpa edəndən sonra yenə təxribat olarsa, sərhəd yenidən qapanacaq. Bu, Qarabağ ermənilərinə çətinlik yaradacaq, xəstələri Ermənistana gedə bilməyəcək, ərzaq daşınması dayandırılacaq. Ona görə də, Qarabağ ermənilərinin bugünkü insidentə görə iradları Ermənistan hərbçilərinə ünvanlanmalıdır”.
Azərbaycanın keçmiş xarici işlər naziri Tofiq Zülfüqarov hesab edir ki, Laçın sərhəd keçid məntəqəsində baş verən hadisələr bir daha Ermənistanın təxribatlar törətməklə regionda gərginliyi daim artıracağını göstərir.
“Ermənistan tərəfi, həmişə olduğu kimi, gərginliyi artırmaqla bu və ya digər şəkildə beynəlxalq ictimaiyyətə hansısa mesajlar göndərməkdədir. Məqsəd odur ki, gərginlik fonunda hansısa siyasi dəstək təklifi alsınlar. İndi həmin taktika üzərində iş aparırlar. Sərhəddə baş verən təxribatlar da onu göstərir. Azərbaycan öz cavabı ilə göstərmək istəyir ki, bu cür təxribatlar ilk növbədə Ermənistan üçün baha başa gələcək. Bu təxribatlardan onları uzaqlaşdırmaq üçün hesab edirəm ki, sərt addımlar strategiyası – bir növ İsrail strategiyası orada tətbiq olunmalıdır”, Zülfüqarov deyib.
