Azərbaycanlı kospleyerlər: Onlar kimdir və nə istəyirlər?
Kospley nədir? Azərbaycanda kospleyerlər varmı? Azərbaycanda bu sahə nə qədər inkişaf edib? Bütün bunlara cavab almaq üçün JAMnews ölkənin azsaylı kospleyerlərindən biri – Ayna Zərbəliyeva ilə söhbət edib.
- Fövqəlinsan necə yaradılırdı – Abxaziyadakı meymun yetişdirmə müəssisəsinin əfsanələri və həyatı
- Qvantsa – əlil arabasındakı qılıncoynadan qızın hekayəsi
- Azərbaycan mentaliteti: 5 yaxşı və 5 pis cəhət
Kospley nədir?
Ayna deyir ki, “kospley” sözü ingilis dilində “costume” (kostyum) və “play” (oynamaq) sözlərinin birləşməsindən yaranıb. “Yəni xoşladığın müəyyən bir personajın geyimini, tərzini seçirsən. Tikməyi bacarırsansa, kostyumu özün tikirsən. Əgər bacarmırsansa, internet saytlarından sifariş edirsən, yaxud da dərzilər köməyinə çatır. Parik, makiyaj, qrim və s. isə çox vaxt öz əlinin əməyi olur. Daha sonra həmin personaj kimi davranmağa başlayırsan, “AzeCon”, “CosplayFest” kimi müsabiqələrdə səhnəyə çıxırsan və personajını canlandırırsan”, – Zərbəliyeva danışır.
Kospley özü-özlüyündə anime, film, kitab və komikslərdən ilhamlanmaqla ortaya çıxır. Solo, komanda şəklində çıxış kimi seçimlər mövcuddur. Ayna deyir ki, növ, tərz fərq etmir. Əsas odur ki, bu işə ürəklə yanaşasan.
Kospleyə həvəs necə yaranır?
Ayna bu barədə belə söyləyir: “Hər kəsin fərqli hekayəsi var. Məndə bu, bir az romantikdir. Bir personaja vurulmuşdum və inanırdım ki, onunla mental əlaqəmiz yaranıb. Qərar verdim ki, bu personajı səhnədə canlandırmaq istəyirəm. “Sally Face” oyunundan Sally Fisher personajı idi. Çox az tanınan fan-klubu var. Bilirdim ki, kospleyim o qədər də diqqət cəlb etməyəcək. Sadəcə, özüm üçün edirdim. Lakin gözlədiyim kimi olmadı…”
Aynanın indi 2000-ə yaxın izləyicisi var. Üç il üçün çox böyük bir göstərici olmasa da, Ayna hobbisinə həvəslə yanaşır. Əsas məqsədi bəyəndiyi personajları canlandırmaqdır. Məşhur fan-klublar onu o qədər də cəlb etmir.
“Hər birini üzdən tanıyıram”
Azərbaycanda neçə nəfər bu işin aludəçisidir? Ayna bu barədə belə danışır:
“Azərbaycanda kospleyerlər o qədər azdır ki, hər birini üzdən tanıyıram. Lakin son illərdə rusdilli yox, azərbaycandilli kospleyerlər kifayət qədər çoxalıb. Belə hobbisi olanlar, əsasən, intravert olur, çünki küçədə bizə qəribə baxırlar”.
Pandemiya bu sahəyə də təsirsiz ötüşməyib
“İldə bir-iki dəfə kospleyerlərin toplaşdığı tədbirlər olur. “AzeCon” və “CosplayFest” buna nümunədir. “AzeCon” artıq 10 ildir keçirilir və ilk dəfə cəmi 10-15 nəfərin iştirakı ilə baş tutub. İndi artıq Əl oyunları sarayında keçirilir. Bu, hər hansı Avropa ölkəsi üçün çox da böyük inkişaf sayılmazdı, lakin Azərbaycan üçün yaxşı göstəricidir”, – qəhrəmanımız deyir.
“AzeCon”un münsiflər heyəti xüsusilə seçilir. Onlar rekvizit hazırlamağı bacarır, pariklərin düzəldilməsi üzrə mütəxəssis, yaxud peşəkar aktyor olurlar. Elə bu üç göstəriciyə uyğun gələn iştirakçılara (solo, komanda – fərq etmir) mükafat verilir.
Ayna bildirir ki, 2020-ci ildə “AzeCon” möhtəşəm olmalı idi, çünki İstanbulda keçirilən tədbirlə əlaqə yaratmışdılar. Bakıda qalib gələn solo iştirakçı “AzeCon”u Türkiyədəki “ComIcon”da təmsil edəcəkdi. Azərbaycan kospleyini tanıtmaq üçün gözəl şans idi. Lakin pandemiyaya görə bu planlar baş tutmayıb.
Azərbaycanlı kospleyerləri necə tapmaq olar?
Onları tapmaq kifayət qədər asandır. “Instagram”da #azericosplayers heştəqindən istifadə edirlər. “Facebook”da isə “AzeCon” qrupunda kifayət qədər kospleyer toplanıb.
“Bizimlə əlaqə saxlamaq üçün şəxsən yazanlar da olur. 5-6 il təcrübəsi olan kospleyerlərə məşhur şirkətlər müraciət edir. Hər hansı məhsulu təqdim etmək üçün təkliflər alırıq”, – Ayna danışır.
Azərbaycanda kospleyin başlanğıcını qoyanlardan biri də Tamilladır (@tamillart). O, ilk “AzeCon”dan bəri bu sahədə seçilənlərdəndir. O zamandan bəri elə il olmayıb ki, Tamilla müsabiqəni mükafatsız tərk etsin.
