Azərbaycanda ölüm hallarının artımı koronavirusdan ölənlərin sayından xeyli çoxdur ​

Artıq ikinci aydır ki, Azərbaycanda ölənlərin rəsmi statistikası son illərin analoji göstəricilərini xeyli arxada qoyub. Eyni zamanda koronavirusdan ölənlərin sayı bu göstəricilərdən çox aşağıdır.

2020-ci ilin iyul ayında Azərbaycanda 6 410 adam ölüb, ötən ilin elə həmin ayında isə ölənlərin sayı 4 902 olub. Rəsmi məlumatlara görə, 2020-ci ilin iyul ayında koronavirusdan 235 ölkə vətəndaşı ölüb.   

Azərbaycan Dövlət Statistika Komitəsinin məlumatına görə, 2020-ci ilin iyun və iyul ayları ərzində ölənlərin sayı son altı il ərzində orta statistik göstəricilərdən 3 755 hal çoxdur.

«Müqayisə üçün, 2019-cu ilin iyul ayında Azərbaycanda 4 902 nəfər ölüb, 2014-2019-cu illərdə isə orta göstərici 4 818 ölüm halı təşkil edib. Başqa sözlə desək, 2020-ci ilin iyul ayında 1592 “artıq” ölüm halı qeydə alınıb», – iqtisadçı və bloger Toğrul Maşallı özünün sosial şəbəkə səhifəsində yazır.

2020-ci ilin iyun ayında “artıq” ölümlərin sayı son altı ilin orta göstəriciləri ilə müqayisədə 2 163 hal təşkil edib.

2020-ci ilin iyul ayında rəsmi olaraq koronavirusdan 235 ölüm halı haqda məlumat verilib. Cəmi iyun və iyul aylarında COVID-19 infeksiyasından 385 nəfər ölüb.

Səhiyyə Nazirliyi ölkədə ölüm hallarının kəskin artımının səbəbəni şərh etmir.