İslam Oyunlarına görə Azərbaycanda yol hərəkətinə məhdudiyyət qoyulub

Baş Yol Polis İdarəsi 2017-ci il mayın 5-dən etibarən Bakının ayrı-ayrı avtomobil yollarında məhdudlaşdırıcı sarı xətt tətbiq edildiyi haqda sürücüləri xəbərdar edib.

Məhdudiyyət Bakıda mayın 10-da 22-ə qədər davam edəcək 4-cü İslam Həmrəyliyi Oyunlarına cəlb olunmuş avtomobillərin maneəsiz hərəkətini təmin etmək üçün tətbiq edilib.

Şəhərin mərkəzində həmçinin avtomobil dayanacaqları da kəskin şəkildə məhdudlaşdırılıb. Yol Polisi ofis əməkdaşlarına Oyunlar davam etdiyi günlərdə daha çox ictimai nəqliyyatdan istifadə etməyi tövsiyə edir.

“Sürücülərin diqqətinə çatdırırıq ki, qadağan olunmuş yerlərdə, həmçinin səki kənarlarında saxlanılan və maneəsiz, rahat hərəkətə mane olan avtomobillər evakuasiya olunacaq. Bu avtomobillərin sürücüləri isə inzibati məsuliyyətə cəlb olunacaq”, – Yol Polisinin müraciətində deyilir.

Məhdudlaşdırıcı sarı xətti keçməyə görə nəzərdə tutulan cərimənin həcmi 40 manatdır (24 USD).