İran öz vətəndaşlarına Gürcüstana səfər etməkdən çəkinməyi məsləhət görür
«Zərurət yoxdursa, Gürcüstana səfər etməkdən çəkinin», — İran vətəndaşları ölkənin Xarici İşlər Nazirliyindən belə tövsiyə alıblar.
Nazirliyin mətbuat katibi Bəhram Qasemi bunu dekabrın 10-da keçirilmiş xüsusi brifinqdə deyib.
Bəhram Qasemi bildirib ki, Gürcüstan sərhədində bir neçə iranlı turistə qarşı hörmətsiz davranış sərgilənib və bu səbəbdən İran vətəndaşlarına bu Qafqaz ölkəsinə səfərlərdən çəkinməyi tövsiyə edir.
Bu, Qaseminin Gürcüstanla bağlı ilk bəyanatı deyil. Daha öncə dekabrın 3-də o bildirmişdi ki, son ay ərzində Gürcüstan 200-ə yaxın İran vətəndaşına ölkəyə daxil olmağı qadağan edib.
Tbilisi İranın Xarici İşlər Nazirliyinin bəyanatına q=artıq reaksiya verib. “Azadlıq” radiosunun məlumatına görə, xarici işlər naziri David Zalkaliani təsdiq edib ki, Tehranla Tbilisi arasında bu məsələ ilə bağlı əlaqə baş tutub.
Zalkaliani deyir ki, “birgə tədbirlər müəyyən edilib” və yaxın zamanlarda problem həllini tapacaq.
O ki qaldı statistikaya, İran vətəndaşlarının deportasiyası ilə bağlı Gürcüstan tərəfində fərqli rəqəmlər var.
Gürcüstan Daxili İşlər Nazirliyinin informasiya-analitik departamentinin statistikasına əsasən, 2018-ci ilin noyabr ayında:
• Gürcüstana 434 İran vətəndaşı buraxılmayıb. Daha sonra Hindistan (370) və Türkiyə (46) gəlir.
• Gürcüstandan 2 İran vətəndaşı qovulub.
• İranın 159 vətəndaşı viza rejimini pozub (İran vətəndaşları Gürcüstanda 45 gün vizasız qalmaq hüququna malikdirlər).
• Gürcüstan sərhədini 17595 İran vətəndaşı keçib ki, bu da ötən ilin noyabrında qeydə alınmış göstəricidən 13% çoxdur.
Nəzərə alsaq ki, səfər edənlərin sayına görə İran ilk beş ölkə sırasındadır, Tehranın narazılığı Gürcüstan iqtisadiyyatında özünü ciddi şəkildə göstərəcək.
Hər ay Gürcüstana on minlərlə iranlı qonaq gəlir. Ötən il bunların sayı az qala 300 min nəfər təşkil edib.
Eyni zamanda, iranlılar Gürcüstanda ən çox pul xərcləyənlərdəndirlər. Bu nöqteyi-nəzərdən İran dördüncü yerdədir. Orta hesabla, hər bir İran rezidenti Gürcüstanda 790 dollar xərcləyir.
“Forbes” jurnalının statistika xidməti tərəfindən təqdim olunmuş məlumata görə, 2018-ci ilin üçüncü rübündə bir qonağın orta hesabla xərclədiyi məbləğə görə ölkələr üzrə sıralama aşağıdakı kimi olub:
•Birləşmiş Ərəb Əmirliklə: 2656 lari (991 dollar)
•İsrail: 2613 lari (975 dollar)
•Almaniya: 2391 lari (892 dollar)
•İran: 2116 lari (790 dollar)
•Qazaxıstan: 1965 lari (733 доллара)
•Rusiya: 1513 lari (565 dollar)
•Ukrayna: 1411 lari (526 dollar)
•Türkiyə: 654 lari (244 dollar)
•Ermənistan: 565 lari (210 dollar)
•Azərbaycan: 430 lari (160 dollar)
