Gürcüstanın Pankisi dərəsinin sakinləri üzərində çeçen liderinin portreti olan Rusiya nömrəli maşına etiraz edib
Pankisi dərəsinin Duisi və Birkiani kəndlərində Gürcüstan DİN-in xüsusi təyinatlıları və hüquq-mühafizə orqanlarının əməkdaşları səfərbər olub. Bu haqda məlumatı Pankisinin ictimai radiosu WAY yayıb.
İyunun 15-də dərənin kəndlərində böyük müsəlman bayramı Ramazan qeyd olunub. WAY Radiosu ehtimal edir ki, günün birinci yarısında baş verən insidentə elə bu səbəb olub.
Dərəyə Rusiya nömrəli, üzərində Çeçenistanda böyük hörmətə sahib respublikanın hazırkı liderinin atası Ahmad Kadırovun portreti olan maşın gəlib. Maşının içində oturanlar hərarətlə “Ahmad möhtəşəmdir!” deyə qışqırırmış.
Bu da yerli sakinlərin narazılığına səbəb olub. Onlar Kadırovun portretlərini yığışdırmağı tələb ediblər. Dava da elə bundan sonra başlayıb.
Hüquq-mühafizəçiləri hadisə yerinə gələndən sonra vəziyyət bir qədər sakitləşib. Gürcüstan DİN-i bəyanat yayaraq bildirib ki, Duisi kəndində yerli sakinlər arasında münaqişə baş verib və bununla əlaqədar olaraq kəndə xüsusi təyinatlılar cəlb olunub.
