Gürcüstanı Rusiyadan yeni miqrant dalğası gözləyirmi?
Rusiyalı miqrantlar Gürcüstanda
Rusiyada mümkün səfərbərliklə bağlı şayiələr yayıldığı bir vaxtda, Gürcüstanda bununla əlaqədar rusiyalı miqrantların yeni dalğasının gələcəyi gözlənilir. Lakin Rusiya-Gürcüstan sərhədindəki Yuxarı Lars sərhəd-keçid məntəqəsi üzrə hazırkı məlumatlar hələlik Rusiyadan kütləvi axını təsdiqləmir.
Avqustun ortalarında Rusiya Gömrük Xidməti Yuxarı Larsda “rekord sərnişin axını” qeydə alındığını bildirib. Qurumun məlumatına görə, avqustun 18-də 20 mindən çox insan minik avtomobilləri ilə sərhədi keçib.
Gürcüstanın Daxili İşlər Nazirliyi Rusiya tərəfinin məlumatlarını təkzib edib. Nazirliyin məlumatına görə, avqustun 8-dən 19-dək Rusiyadan Gürcüstana müxtəlif ölkələrin 7 880 vətəndaşı daxil olub, 8 406 nəfər isə ölkədən çıxıb. Beləliklə, hər iki istiqamətdə sərhədi ümumilikdə 16 286 nəfər keçib.
Daha sonra Rusiya gömrüyü məlumatına aydınlıq gətirərək, sərhədi hər iki istiqamətdə 16 mindən çox insanın keçdiyini bildirib. Bu dəfə qurum həmin göstəricini “rekord” adlandırmayıb və turizm mövsümünün başa çatması səbəbindən daha çox insanın Rusiya istiqamətində hərəkət etdiyini qeyd edib.
Bununla belə, bu məlumat Gürcüstanda narahatlıq yaradıb. Bir çoxları 2022-ci ilin sentyabrını, qismən səfərbərlik elan edildikdən sonra on minlərlə Rusiya vətəndaşının Gürcüstana gəldiyi dövrü xatırlayıb.
Həmin güclü miqrasiya dalğası daşınmaz əmlak qiymətlərinin əhəmiyyətli dərəcədə artmasına səbəb olmuşdu. Bu gün Gürcüstanda bir çoxları vəziyyətin təkrarlana biləcəyindən ehtiyat edir.
Yeni miqrasiya dalğası gözləntisi niyə yaranıb
Rusiyada yeni səfərbərlik dalğası ilə bağlı məlumatlar hələlik təsdiqlənməyib, lakin fəal şəkildə yayılır. İddialara görə, səfərbərlik sentyabrda Dövlət Dumasına keçiriləcək seçkilərdən sonra elan oluna bilər. Bununla bağlı heç bir rəsmi açıqlama verilməyib.
G. Miller International Georgia konsaltinq şirkətinin idarəedici tərəfdaşı Nikoloz Uruşadze deyir ki, hətta bu şayiələr belə Rusiya vətəndaşlarının bir qismini ölkəni tərk etməyə sövq edə bilər.
“Rusiya sonda səfərbərlik elan etməsə belə, onun gözləntisi insanlara təsir edir. Onlar qorxurlar, qorxu isə çox vaxt güclü hərəkətverici amilə çevrilir”, – deyə o, “BusinessPressNews”a bildirib.
Uruşadzenin qiymətləndirməsinə görə, Gürcüstan Rusiya vətəndaşları üçün ən əlçatan istiqamətlərdən biri olaraq qalır və səfərbərlik elan ediləcəyi təqdirdə ölkə yeni miqrant axını ilə üzləşə bilər.
2022-ci ilin təcrübəsi
2022-ci ilin sentyabrında, qismən səfərbərlik elan edildikdən dərhal sonra Yuxarı Lars sərhəd-keçid məntəqəsinin Rusiya tərəfində növbə 20-30 kilometrə çatmışdı. Sərhəddə təxminən 5 500 avtomobil gözləyirdi. Sərhəd-keçid məntəqəsinin yerləşdiyi Şimali Osetiyada hətta hərbi komissarlığın səyyar məntəqəsi yaradılmışdı.
Gürcüstanın o vaxtkı daxili işlər naziri Vaxtanq Qomelaurinin sözlərinə görə, sərhədi sutkada təxminən 10 min nəfər keçirdi. Səfərbərlik elan olunmazdan əvvəl bu göstərici təxminən 6 min nəfər idi.
Miqrasiya nəticəsində müəyyən dövr ərzində Gürcüstanda təxminən 100 min Rusiya vətəndaşı yaşayırdı. Yerli əhalinin bir qismi hakimiyyətdən Rusiya vətəndaşları üçün viza rejiminin tətbiqini tələb edirdi.
Yeni miqrant axını Gürcüstanda qiymətlərə necə təsir edə bilər
Nikoloz Uruşadzenin qiymətləndirməsinə görə, Rusiyadan yeni miqrasiya dalğası ilk növbədə daşınmaz əmlak bazarına təsir göstərəcək. Artan tələbat, ilk növbədə, kirayə mənzillərin qiymətlərini yenidən yüksəldə bilər. Gürcüstan 2022-2023-cü illərdə artıq belə vəziyyətlə üzləşib: Rusiya vətəndaşlarının kütləvi axını Tbilisi və Batumidə mənzil kirayəsinin qiymətini kəskin artırmışdı.
Rusiya, eləcə də Ukrayna və Belarus vətəndaşları Gürcüstanda daşınmaz əmlakı da fəal şəkildə alırlar. 2026-cı ilin birinci yarısında onların payı bütün alıcıların 18%-ni təşkil edib. Bir il əvvəl bu göstərici 13% idi. Eyni dövrdə kurort şəhəri Batumidə mənzil alanlar arasında Gürcüstan vətəndaşlarının payı 43%-dən 33%-ə enib.
Uruşadze daha bir problemə də diqqət çəkir. Onun qiymətləndirməsinə görə, Rusiya vətəndaşlarının bir qismi yerli cəmiyyətə və iqtisadiyyata inteqrasiya etmir, əvəzində öz qapalı infrastrukturunu yaradır.
“Gürcüstan elə bir ölkədir ki, buraya 300 min rusiyalı gəlib öz məktəbləri və universitetləri ilə kiçik bir Rusiya yarada bilər. Bu halda onlara nə gürcü dili, nə də başqa bir şey lazım olacaq”, – deyə o bildirib.
Hazırkı mərhələdə Rusiya-Gürcüstan sərhədindəki vəziyyət 2022-ci ildəki kütləvi axını xatırlatmır. Avqustda yaranan növbələr əsasən turizm mövsümü və əlverişsiz hava şəraiti səbəbindən sərhədin müvəqqəti bağlanması ilə əlaqədar olub. Bir çoxları Gürcüstana daxil deyil, ölkədən çıxaraq Rusiyaya geri qayıdırdı. Yeni axının real miqyası daha sonra aydınlaşacaq. Həlledici amil isə Rusiya rəhbərliyinin səfərbərliklə bağlı rəsmi qərar qəbul edib-etməməsi olacaq.
Rusiyalı miqrantlar Gürcüstanda
