Kipr-Azərbaycan oyunu boş tibunalarla keçiriləcək: azarkeşlər üçün bu niyə yaxşıdır?
Bu gün Mərkəzi Avropa vaxtı ilə saat 20:45-də Kiprdə futbol üzrə Millətlər Liqasının qrup mərhələsində yerli yığma ilə Azərbaycan milli komandası arasında oyun başlayacaq. Bu iki ölkə komandaları arasındakı qarşıdurma tarixi meydançada baş verən davalar, həm futboçular, həm də azarkeşlərin ədəbsiz davranışları ilə zəngindir.
Oyundan əvvəlki siyasi fon
Şərqi Aralıq dənizində yaşanan gərginlik fonunda Kipr və Azərbaycan yığmaları arasında oyunun döyüş meydanına çevrilməsi gözləniləndir, həm də yalnız futbolda yox. Azərbaycanda Kiprin cənub hissəsini çoxları Yunanıstan “anklavı” hesab edir, üstəlik Azərbaycan bütün səviyyələrdə Türkiyəyə dəstək ifadə edir.
• Aralıq dənizində qaz NATO stabilliyinə təhdid kimi. Analiz
Bu günlərdə prezident İlham Əliyev Bakıda Yunanıstan səfiri ilə görüşdə diplomatik dildə Yunanıstan tərəfinə əsl ultimatum verib və Türkiyənin atdığı bütün addımlara tam dəstək ifadə edib. Əliyev deyib: “Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik. Biz eyni dəstəyi türk qardaşlarımızdan da görürük. Onlar Azərbaycanı bütün məsələlərdə dəstəkləyirlər və biz onları bütün məsələlərdə dəstəkləyirik, o cümlədən Şərqi Aralıq dənizində kəşfiyyat məsələsi ilə bağlı”.
Yaxşı tanıdığımız əğyar?
2015-ci ilin yayında Kiprdə Larnak şəhərində UEFA Avropa Liqasının üçüncü seçmə raundunda yerli “Apollon” və Azərbaycanın “Qəbələ” klubunun görüşü baş tutub. Oyunun ilk dəqiqələrindən Azərbaycan klubunun oyunçularına qarşı tribunalardan türk və ingilis dilində söyüşlər yağdırılıb.
Kipr komandasının azarkeşləri Azərbaycanın dövlət bayrağını yandırmağa cəhd göstəriblər, amma polislər vandalizm aktının qarşısını ala bilib. Amma artıq heç-heçə bitən (1:1) oyunun sonunda əsl dava düşüb, davada hər iki klubun oyunçuları və azarkeşləri iştirak edib.
2019-cu ildə Azərbaycanda keçirilən yeniyetmələrdən ibarət “Qəbələ” və “APOEL” klublarının görüşündə növbəti böyük dava yaşanıb. Kiprlilər qol sevincini “çox qızğın” ifadə etdikləri üçün meydançada futbolçular arasında dava başlayıb. Bu oyun da 1:1 hesabı ilə sona çatıb.
2015-ci ildə baş tutan “Apollon” – “Qəbələ” oyununa qayıtdığımız zaman görüşün səbəb olduğu faciəvi hadisəni də xatırlamaq lazımdır. Oyundan bir neçə gün sonra Bakıda…
…jurnalist öldürülüb
Azərbaycan komandasının futbolçusu Cavid Hüseynov Kiprdə oyun zamanı penalti vurmuş və tribunalara ədəbsiz əl hərəkəti göstərmişdi. Onun bu ehtiyatsız davranışı yerli klubun onsuz da sakit olmayan azarkeşlərini daha da əsəbiləşdirmişdi.
Səhəri gün azərbaycanlı jurnalist Rasim Əliyev Hüseynovun vurduğu qoldan sonrakı hərəkətini tənqid etmişdi.
2015-ci il avqustun 8-də bir qrup şəxs Əliyevə evinin yaxınlığında hücum edib, amansızca döymüşdü və bunun nəticəsində jurnalist xəstəxanada vəfat etmişdi.
Polis futbolçu Cavid Hüseynovun yaxınları olan bu insanları həbs edib. Futbolçu özü də müəyyən müddətə azadlıqdan məhrum edilib və yenidən azadlığa çıxıb.
Niyə tamaşaçısız?
Koronavirus pandemiyasına görə UEFA öz himayəsi altında bütün beynəlxalq oyunları boş tribunalar qarşısında keçirmək qərarına gəlib.
Azarkeşlər oyunları yalnız televiziya vasitəsilə izləyə biləcəklər, bu da kiprli və azərbayanlı azarkeşlər arasında növbəti mümkün toqquşmanın profilaktikası üçün çox yaxşıdır.
Sentyabrın 5-də öz meydançasında Lüksenburq yığmasına məğlub olandan sonra (1:2) Azərbaycan milli komandasının azarkeşləri yığmanın bugünkü oyunda qələbə qazana biləcəyinə şübhə ilə yanaşırlar.
Sosial şəbəkələrin Azərbaycan seqmentindən bir neçə xarakterik şərhi təqdim edirik:
“Bu gün televizorun qabağında oturanda çətir götürməyi unutmayın, bizi qol yağışına tutacaqlar”.
“Yığmamızdan böyük məğlubiyyət gözləyirəm, düzü, buna heç məyus da olmayacam”.
“Ən yaxşısı oyuna baxmayacam, məyusluqdan başqa bir şey deyil”.
